ऊर्जाको पहुँच विस्तारमा निजी क्षेत्रको भूमिका महत्वपूर्णः मन्त्री बस्नेत

८ वैशाख, काठमाडौं । ऊर्जा, जलस्रोत तथा सिँचाइमन्त्री शक्तिबहादुर बस्नेतले मुलुकमा राष्ट्रिय प्रसारण लाइन पुग्न नसक्ने क्षेत्रमा नवीकरणीय ऊर्जा प्रविधिको माध्यमबाट ऊर्जाको पहुँच पुर्याउने बताएका छन् । यसनिम्ति निजी क्षेत्रको भूमिका महत्वपूर्ण रहेको बताए । 

नेपाल नवीकरणीय ऊर्जा परिसंघका अध्यक्ष गुणराज ढकालसहितको टोलीसँगको भेटमा मन्त्री बस्नेतले नवीकरणीय ऊर्जा प्रविधिको उपयुक्त प्रवर्द्धन र विकासका लागि सरकार निजी क्षेत्रसँग सहकार्य गर्न तयार रहेको मन्त्री बस्नेतले बताए । 

परिसंघ र भारतको सौर्य ऊर्जा विकास संस्था एकापसमा अनुभव, प्राविधिक क्षमता र पुँजी व्यवस्थान गरी दुवै पक्षलाई लाभ हुने गरी समझदारी हुन लागेकोमा मन्त्री बस्नेतले खुसी व्यक्त गरे ।

सो अवसरमा ग्रामीण जनजीवनलाई आर्थिक तथा सामाजिकरुपमा उत्थान गर्न देशमा नै उपलब्ध सीप तथा पुँजी परिचालन गर्दै नवीकरणीय ऊर्जा प्रविधिको विकास तथा उपयोग गर्नुपर्ने, संघीय सरकारले निर्धारण गर्ने कार्यक्रम निजी क्षेत्र मैत्री र उपभोक्तालाई अत्यधिक लाभ हुने गरी ऊर्जा प्रविधिकाे विकास गर्नुपर्ने सुझाव दिइएकाे छ । 

साथै, मिश्रित ऊर्जाको अवधारणा तथा साना तथा घरेलु उद्योग, कृषिका लागि पनि नवीकरणीय ऊर्जा प्रविधिलाई प्राथमिकता दिन परिसंघको तर्फबाट सुझाव प्रस्तुत गरिएको थियो ।