नेपालमा करको दायरामा आयो गुगल

८ वैशाख, काठमाडौं । गुगल र ई विस्को इंक नेपालको कर कार्यालयमा दर्ता भएको छ । आन्तरिक राजस्व विभागका अनुसार ‘विद्युतीय सेवा कर (डिजिटल सर्भिस ट्याक्स) सम्बन्धी कार्यविधि २०७९’ बनेपछि यी दुई कम्पनी दर्ता भएका छन् । योसँगै आगामाी आर्थिक वर्षदेखि करको दायरामा समेत आउनेछन् । 

चालू आवको बजेटमार्फत अर्थ मन्त्रालयले गैरबासिन्दा व्यक्तिले नेपालका उपभोक्तालाई उपलब्ध गराएको विद्युतीय सेवाको कारोबार मूल्यमा विद्युतीय सेवा कर असुल गर्ने नीति लिएको छ । 

योसँगै नेपालभित्र अधिक प्रयोग हुने फेसबुक पनि करको दायरामा ल्याउने भएको छ । साथै ट्विटरलगायतका सेवाहरु समेत करको दायरामा आउने बाटो खुलेको छ । कार्यविधिमा विज्ञापन, चलचित्र, टेलिभिजन, संगीत, ओभर द टप क्लाउड सेवा, गेमिङ, मोबाइल एप, अनलाइन मार्केट, सफ्टवेयरलगायतलाई विद्युतीय कर सेवाअन्तर्गत राखिएको छ ।