कञ्चनपुरमा घाँस काटिरहेकी एक महिलालाई बाघले लग्यो

८ वैशाख, काठमाडौं । बाघले कञ्चनपुरको बेलौरी नगरपालिका–८ पचुईमा एक महिलालाई आक्रमण गरी जंगलतर्फ लगेको छ ।

जिल्ला प्रहरी कार्यालय कञ्चनपुरका अनुसार बिहीबार दिउँसाे स्थानीय ४२ वर्षीया गंगा चन्दलाई घाँस काटिरहेका बेला बाघले आक्रमण गरी लगेको हो । 

गंगा घर छेउकै खप्टी नालामा घाँस काटिरहेकी अवस्थामा आक्रमण गरी घिसार्दै नजिकैको बाक्लो झाडीभित्र लगेको बताइएकाे छ ।

उनको खोजी भइरहेको जिल्ला प्रहरी कार्यालय डिएसपी प्रकाश डांगीले बताए । झाडी क्षेत्रमा नाला समेत रहेको सिमसार जमिन र बाक्लो झाडीका कारण खोजीमा समस्या भएको उनको भनाइ छ । 

यसअघि चैत तेस्रो साता मात्रै भारतको दुधुवा राष्ट्रिय निकुञ्जमा बाघको आक्रमणमा परि पुनर्वास नगरपालिका–१० की एक महिलाको ज्यान गएको थियो ।