नेपालमा बन्ने सवारी साधन दर्ताकाे व्यवस्था गर्न प्रधानमन्त्रीको निर्देशन

१० वैशाख, काठमाडौं । प्रधानमन्त्री पुष्पकमल दाहाल ‘प्रचण्ड’ले नेपालमा बन्ने यात्री मोटरसाइकललगायत सवारी साधन दर्ताकाे व्यवस्था गर्न निर्देशन दिएका छन् ।

प्रधानमन्त्रीले आइतबार मात्र मुख्यसचिव शंकरदास बैरागीमार्फत् सम्बन्धित निकायलाई यस्तो कानूनी प्रबज्ध मिलाउन निर्देशन दिएको प्रधानमन्त्रीको कार्यालयले जनाएको छ ।

कानूनको अभावमा नेपालमा एसेम्बलिङ सवारीको दर्ता हुन सकिरहेको छैन । सवारीसाधन दर्ताका गर्न भन्सारको पज्ञापन पत्र, भन्सार तिरेको रसिद र आयात गर्ने कम्पनीको नाम अनिवार्य चाहिने अहिलेकाे कानुनी व्यवस्था छ । विभिन्न पाटपुर्जा ल्याएर देशभित्रै तयारी पारिएका सवारी दर्ता हुने गरी कानून बनाउन व्यवसायीहरुले माग गर्दै आइरहेका बेला प्रधानमन्त्रीले दर्ता गर्न मिल्ने कानून बनाउन निर्देशन दिएका हुन् ।

दर्ताका कानून नहुँदा देशभित्र बनाइएका सवारीलाई सडकमा ट्राफिकले सवारी धनीलाई चेकजाँचका क्रममा दुःख दिने गरिएको जनगुनासो रहँदै आएको छ ।

‘यात्री’ लगायत नेपालमा उत्पादित सवारी साधन दर्ता नभएको भन्ने गुनासोलाई गम्भीरतापूर्वक लिएको छु,’ प्रधानमन्त्री दाहालले भनेका छन्, ‘सवारी साधन दर्ता एवं स्वदेशी उत्पादनलाई प्रवर्द्धन गर्नेगरी तत्काल कानुनी प्रबन्धको प्रक्रिया अगाडि बढाउन नेपाल सरकारका मुख्यसचिवमार्फत् सम्बन्धित निकायलाई निर्देशित गरेको छु।’

यात्री माेटरसाइकल कम्पनीले व्यवसायिक रूपमै नेपालभित्र विद्युतीय माेटरसाइकल बनाइरहेकाे छ । तर कानुकाे अभावमा खरिदकर्ताले सहजै खरिदगर्न मानरहेका छैनन्  । उसले हालसम्म ९० वटाभन्दा बढी मोटरसाइकल बनाएर बिक्री गरिसकेको छ ।