कडा सुरक्षा घेराबीच चितवनको मतगणना सुरू

११ वैशाख, चितवन । आइतबार सम्पन्न चितवन २ को उपनिर्वाचनको मतगणना सुरू भएको छ । सोमबार बिहान बसेको सर्वदलीय बैठकमा भएको सहमतिअनुरुप इच्छाकामना गाउँपालिकाबाट मतगणना सुरु भएको हो । 

राष्ट्रिय स्वतन्त्र पार्टीका उम्मेदवार रवि लामिछाने तथा चितवनका प्रमुख जिल्ला अधिकारीले निर्वाचनका दिन आचारसंहिता उल्लंघन गरेको भन्दै नेपाली कांग्रेसले मतगणनास्थलमा जान अस्वीकार गर्दै आइरहेको थियो । 

उम्मेदवार लामिछाने र सीडीओ सुरेन्द्रपौडेललाई कारबाही गर्नुपर्ने माग राख्दै आएको कांग्रेसले सोमबार बिहान ३ बुँदे सहमतिपछि मतगणना गर्न मञ्जुरपछि मतगणना सुरु भएको हो । सहमति अनुसार सीडीओ पौडेल मतगणना स्थलमा अनपस्थित भएका छन् । मतगणना भरतपुरस्थित नेपाल उद्योग वाणिज्य संघको भवनमा भइरहेको छ । इच्छाकामनाको वडा नं. १ र ३ को मत गन्ने काम सुरु भएको छ ।

गणनास्थललाई तारजालीले घेरा मारेको छ । २०७४ को स्थानीय तहको चुनाव भरतपुर महानगरपालिकाको चुनावमा माओवादी केन्द्रबाट प्रधानमन्त्री प्रचण्ड पुत्री रेणु दाहाल र एमालेबाट उम्मेदवारबीच मत गणना परिणाम कडा टक्कर चलिरहेका बेला दाहालका प्रतिनिधिले मतपत्र च्यातिदिएपछि परिणाम रद्द भएर पुनः चुनाव भएको थियो । सोही घटनादेखि त्यसपछिका सबै तहका चुनावमाको मतगणना गर्दा गणनास्थललाई तारजालीले घेरा मार्न सुरु गरिएको हो ।