शुक्लाफाँटामा गंगा चन्दको ज्यान लिने नरभक्षी बाघलाई चिडियाखानामा ‘महारानी’ बनाएर राखियाे

११ वैशाख, काठमाडौं । कञ्चनपुरको शुक्लाफाँटा राष्ट्रिय निकुञ्ज क्षेत्रमा स्थानीय गंगा चन्दको जयन लिएको नरभक्षी पोथी बाघलाई ललितपुरको जावलाखेलस्थित सदर चिडियाखानामा ल्याइपुर्याइएको छ ।

गत शुक्रबार स्थानीय गंगादेवी चन्दसहित महिलाहरुको घाँस काटिरहेका बेला उक्त बाघले चन्दलाई आक्रमण गरी घिसार्दै जंगल लगेर शरीरको केही भाग खाएको अवस्थामा शव फेला परेको थियो । बेलौरी नगरपालिका–८ की ४२ वर्षीया चन्दलाई बाघले आक्रमण गरी घिसार्दै लगेको देखेपछि साथीहरुले भागेर ज्यान जोगाएका थिए । उनीहरुले नै सुरक्षाकर्मीलाई घटनबारे खबर गरेका थिए ।

पछि वनका कर्मचारी हात्तीको सहायतामा शनिबार मात्र पोथी बाघलाई डार्ट (सुई) गरेर बेहोसु बनाई नियन्त्रणमा लिएर आइतबार साँझ चिडियाखाना ल्याइएको हो । यही बाघले निकुञ्जको भारतीय सीमा क्षेत्रमा दुई जना भारतीयको समेत ज्यान लिएको बताइएको छ । नरभक्षी बाघलाई चिडियाखानामा ल्याएर बाघलाई ‘महारानी’ दिइएको छ ।

उसलाई चिडियाखानामा यसअघि बर्दिया राष्ट्रिय निकुञ्जबाट ल्याइएका नरभक्षक भाले बाघसँग राखिने भएकाले ‘महानरानी’ नाम दिइएको चिडियाखानाका प्रमुख डाक्टर नरेश सुवेदीले बताए। योसहित चिडियाखानामा बाघको संख्या ६ पुगेको छ । योभन्दा थप बाघ राख्न सकिने अवस्था नरहेको उनको भनाइ छ ।