एमाले ढाल्ने खेलमा नलाग्ने उपमहासचिव रिमालको भनाइ

१२ वैशाख, काठमाडौं । नेकपा (एमाले)का उपमहासचिव विष्णु रिमालले एमाले सरकार बनाउने र ढाल्ने खेलमा नलाग्ने बताएका छन् । 

पार्टीले सञ्चालन गरेको ‘मिसन ग्रासरुट’ कार्यक्रमको समापनका लागि मंगलबार धादिङ पुगेका उपमहासचिव रिमालले एमाले जिम्मेवार प्रतिपक्ष बनेर खवरदारी गर्ने बताए । 

अर्थतन्त्र संकटमा पर्न नदिन एमालेले जिम्मेवार भूमिका खेल्ने बताउँदै वर्तमान सरकार दलगत स्वार्थ व्यवस्थापनमा केन्द्रित भएकाले प्रमुख प्रतिपक्षका रुपमा एमालेले खबरदारी जारी राख्ने उनले बताए । 

अर्को प्रसंगमा रिमालले अहिलेको उपनिर्वाचनमा आएको चुनावी नतिजाले नीतिगत तथा राजनीतिक प्रभावमा कुनै फरक नपर्ने बताए । उपनिर्वाचनमा एमालेले केही नपाएको र केही नगुमाएको बताए ।

उनले आजै मात्र सामाजिक संजालमा स्टाटस लेख्दै निर्वाचनमा जीत–हार, स्वभाविक प्रक्रिया भएको र परिणाम जनताको रोजाईकै आउने बताएका छन् ।