मोरङका सीडीयो मन्त्रालय तानिए

१२ वैशाख, काठमाडौं । मोरङमा कार्यरत सीडीयो तिर्थ भट्टराई मन्त्रालय तानिएका छन् । राष्ट्रिय परिचयपत्रमा अभिलिखित नागरिकका वैयक्तिक र जैविक विवरण रुजु गर्ने ठेक्का निजी कम्पनीलाई दिनका लागि बोलपत्रलगायत प्रक्रियामा संलग्न रहेको भन्दै उनलाई मन्त्रालय ताानिएको हो । उनीसहित राष्ट्रिय परिचयपत्र तथा पञ्जीकरण विभागका एक अधिकारी पनि छानबिनका लागि मन्त्रालय तानिएका छन् ।

हाल मोरङका प्रमुख जिल्ला अधिकारी रहेका विभागका तत्कालीन महानिर्देशक तीर्थराज भट्टराई र पञ्जिकरण विभागका निर्देशक मुकेश रेग्मी छानबिनका लागि  गृह मन्त्रालय तानिएका हुन् । सार्वजनिक खरिद ऐनविपरीत ७ दिने बोलपत्रबाट परिचयपत्रका जैविक र वैयक्तिक विवरण रुजु गर्ने ठेक्का निजी कम्पनी एडभान्टेज इन्टरनेसनललाई दिन गरिएका निर्णय प्रक्रियामा दुवै जना संलग्न थिए ।

तत्कालीन उपप्रधान तथा गृहमन्त्री रवि लामिछानेले मन्त्री बनेको तीन दिनमै माघ १३ मा मन्त्रीस्तरीय निर्णयबाट ‘नागरिकका विवरण प्रमाणीकरण एवं अन्तरप्रणाली आबद्धतासम्बन्धी कार्यविधि–२०७९’ जारी गर्दै ऐनविपरीत ७ दिने बोलपत्रबाट एउटा मात्र कम्पनी प्रतिस्पर्धामा उतारेर एडभान्टेजलाई प्रमाणीकरणको ठेक्का दिलाएका थिए । उक्त कार्यविधिअनुसार बोलपत्र प्रक्रिया र ठेक्का सम्झौता विभागबाट भएको थियो । एडभान्टेजको एकल आवेदन परेपछि उसैलाई १० वर्षका लागि रुजु गर्ने इजाजत दिइएको थियो ।

लामिछानेले जारी गरेको उक्त कार्यविधि सार्वजनिक खरिद ऐनका प्रावधानविपरीत भएको विषयमा कान्तिपुरले समाचार प्रकाशित गरेको थियो । त्यसपछि गत वैशाख ५ को मन्त्रिपरिषद् बैठकले कार्यविधि खारेज र ठेक्का रद्द गर्दै त्यस प्रक्रियामा संलग्नमाथि छानबिन गर्न समिति बनाएको थियो ।

छानबिन गर्न गृहले विभागका तत्कालीन महानिर्देशक भट्टराई र हालका निर्देशक रेग्मीलाई सोमबार मन्त्रालय तानेको हो । भट्टराईलाई मन्त्रालय तानेर उनको ठाउँमा संखुवासभाका प्रजिअ वीरेन्द्र यादवलाई पठाइएको छ । भट्टराई परिचयपत्रको रुजु गर्ने ठेक्काको काम पूरा भएपछि माघ १३ मा मोरङको प्रजिअ भएर गएका थिए ।