प्रतिनिधिसभा बैठकमा एमाले सांसद कोइरीको खोजी

१२ वैशाख, काठमाडौं । मंगलबार बसेको प्रतिनिधिसभाको बैठकमा शून्य समयमा बोल्दै सांसदहरुले एमालेका सांसल लक्ष्मी महतो कोइरीमाथि किन कारवाही भएन ? भन्दै प्रश्न उठाएका छन् ।

राष्ट्रिय स्वतन्त्र पार्टी (रास्वपा)की सांसद निशा डाँगीले हत्या आरोपी गएकाे मंसिर ४ मा भएकाे प्रतिनिधिसभा चुनावमा महोत्तरी १ बाट निर्वाचित नेकपा (एमाले) सांसद कोइरीका विषयमा प्रश्न उठाइन् । 

‘उनले कोइरी सदनमा जानकारी गराएर अनुपस्थित भएका हुन् वा जानकारी नगराईकन ? भन्दै संसदलाई जानकारी दिन सभामुखसँग आग्रह गरिन् । प्रहरीले फरार सूचीमा राखेको भनिएको महतोबारे तत्काल सदनलाई जानकारी दिनुपर्ने उनले बताइन् ।

सदन बैठकमा निरन्तर १० वटा बैठकमा अनुपस्थित हुने सांसदको पद रिक्त हुने व्यवस्था रहेको स्मरण गराउँदै उनले महतो पद बहाल रहे नरहेको कुरा सभामुखबौ सुन्न चाहेको बताइन् ।

निर्वाचितपछि कोइरीले संसद भवनमै सहभागी भएर ज्येष्ठ सांसदबाट सांसद पदको शपथ खाएका थिए । त्यसपछि सरकारकाे चर्काे विराेध भएकाे थियाे ।

त्यसपछि रबि लामिछाने गृहमन्त्री छँदा कांग्र्रेसका सांसद रामहरि खतिवडाले फरार सूचीमा रहेका सांसद महतोलाई पक्राउ गर्न बेवास्ता गरेको भन्दै सरकारको चर्को आलोचना गरेका थिए । मधेश आन्दोलनका क्रममा २०७६ मा सशस्त्र प्रहरी हवल्दारको हत्या घटनामा संलग्नताको आरोपमा महतोलाई प्रहरीले फरार सूचीमा राखेर खोजी गरिरहेको छ ।