बारा २ मा सत्तागठबन्धनका यादव निरन्तर अगाडि, जितकाे संभावना बलियाे

१२ वैशाख, काठमाडौं । बाराको क्षेत्र नम्बर २ को प्रतिनिधिसभा सदस्यको उपनिर्वाचनको जारी मतगणना परिणाममा जनता समाजवादी पार्टीका उम्मेदवार उपेन्द्र यादव निरन्तर अगाडि रहेका छन् । उनलाई सत्तारुढ दलहरुसम्मिलित गठबन्धनको समर्थन गरेका छन् । 

पछिल्लो मतपरिणाम अनुसार झण्डै ३० हजार मतगणना गर्न बाँकी हुँदा यादवले १८ हजार ९६ मत ल्याएका छन् । भने उनलाई पछ्याइरहेका जनमतका उम्मेदवार १३ हजार ८ मत ल्याएका छन् । 

तेस्रोमा परेका एमालेका उम्मेदवार पुरुषोत्तम पौडेलले ५ हजार ४५९ मत ल्याएका छन् । बारा २, तनहुँ १ र चितवन २ गरी ३ वटा क्षेत्रमा भएको उपनिर्वाचनमध्ये चितवन र तनहुँ २ ठाउँमा जित निकालेको रास्वपाकाे अवस्था बारामा भने नाजुक देखिएकाे छ । चितवन र तनहुँमा भने गठबन्धनको उम्मेदवार पराजित भइसकेका छन् ।

रास्वपाका उम्मेदवार रमेश खरेलले जारी मतगणनामा २ हजार १६३ मत मात्र पाएका छन् । उनी नेपाल प्रहरीका पूर्व डीआईजी हुन् । उता तनहुँ १ मा पराजय व्यहोरेका सर्वेन्द्र खनाल पनि नेपाल प्रहरी पूर्वआईजी हुन् ।