आर्थिक संकटले सत्ता पक्ष र विपक्ष भनेको छैनः गुरुङ

१२ वैशाख,काठमाडौं । नेपाली कांग्रेसका उपसभापति धनराज गुरुङ अहिले देशमा देखिएको आर्थिक संकट सत्ता पक्षका लागि मात्र नभएको बताएका छन् । उनले सत्ता पक्षलाई मात्र आर्थिक संकट लागेको हिसाबले विपक्षी दलहरूले कुरा उठाएको भन्दै उपसभापति गुरुङले अहिलेको आर्थिक संकटले प्रतिपक्षलाई पनि छोएकाले यसको समाधानका लागि पक्ष र विपक्ष भन्न नमिल्ने बताएका हुन् । 

प्रतिनिधिसभाको मंगलबारको बैठकमा सांसद गुरुङले मुलुकको अर्थतन्त्र समस्यामा रहेको भन्दै त्यसको समाधानका लागि सत्ता पक्ष र विपक्षी दल एक भएर लाग्नुपर्ने बताए । सांसद गुरुङले मुलुकको आर्थिक संकट समाधानका लागि पुँजीगत खर्च कटौती गरिएको भन्दै पुँजीगत खर्च कटौती गरेर मुलुकको अर्थतन्त्र उकास्न नसकिने बताए । उनले यो संकटबाट मुलुकलाई छुटकारा दिन सबै एक ठाउँमा उभिनु पर्ने बताए । 

उनले भने, ‘अहिले हामी निकै अप्ठेरो अवस्थाबाट गुज्रिरहेका छौं । मुलुक आर्थिक महासंकटमा परेको छ र हामीबाट यी समस्याको समाधान खोज्नै पर्छ । तर, समाधानको उपाय खोज्ने क्रममा अहिले हामी आर्थिक महासंकटबाट गुज्रिएको नाममा पूँजीगत खर्च भारी रुपमा कटौती गर्न खोजिएको आभास भएको छ । पूँजीगत खर्च कटौती गरेर देशलाई अधोगतितिर लैजान सकिँदैन । अर्थतन्त्रमा देखिएको संकट मोचनका लागि सत्तापक्ष र प्रतिपक्ष भन्न मिल्दैन ।’ 

अर्थतन्त्रमा देखिएको संकटबाट मुलुकलाई जोगाउने उपाय खोज्नुपर्ने गुरुङको भनाइ थियो । उनले अस्ट्रेलिया विकसित मुलुक भएर त्यहाँको राष्ट्रिय जनावर कंगारु मारेर छाला निर्यात गरिरहेको र त्यसको मासु आन्तरिक प्रयोगमा ल्याएको भन्दै नेपालको बाँदर समस्या पनि यसै गरी हल गर्नुपर्ने बताए । गुरुङले श्रीलङ्काले हालसालै एक लाख बाँदर निर्यात गर्ने निर्णय गरेको उल्लेख गर्दै हाम्रा गाउँमा पनि अहिले बाँदर आतंक मच्चिएको र बाँदर आतंकले खेतबारी बाँझो राख्नु परेको बताए । 

उनले कृषिमा आधुनिकीकरण र वैज्ञानिकीकरणका कुरा गरिरहँदा किसानले लगाएको बाली टिप्ने बेलामा बाँदरको हुल आएर लुटेर लाने गरेकाले नेपालले पनि बाँदर निर्यात गरिदिए कसो होला भन्दै प्रश्न गरेका थिए । बाँदर निर्यात गर्दा कसैले आलोचना गर्ने हुन् कि भन्ने आफूलाई आशंका रहेको पनि गुरुङको भनाइ थियो । उनले बाँदर निर्यात गरौं भन्दा डलर वादी चिच्याउने हुन कि भन्ने मलाई आशंका पनि बताउँदै बाँदर आतंकलाई अन्त्य गर्नुपर्ने र आर्थिक अवस्थालाई हेरेर पनि बाँदर निर्यात गर्ने निर्णय गर्दा खासै फरक नपर्ने आफ्नो धारणा रहेको बताए ।