लहडमा नयाँ स्टकएक्सचेञ्जकाे आवेदन खाेलेर नेप्सेमाथि अन्याय गर्याे : सांसद सिंह

१२ वैशाख काठमाडौं । प्रतिनिधिसभा सदस्य एवं स्वतन्त्र सांसद अमरेशकुमार सिंहले नयाँ स्टक एक्सचेञ्जको लाइसेन्स आवेदन खुला प्रक्रियामा भ्रष्टाचारको आशंका भएकाे बताएका छन् । उनले नयाँ लाइसेन्स दिन थालिएको प्रक्रियामा अख्तियारको दुरुपयोग गरेको जिकिर गरेका छन् । 

नियमक निकाय धितोपत्र बोर्ड आफैंले नयाँ स्टक एक्चेञ्जको लाइसेन्स खाेलेर नेप्सेलाई नै धरापमा पार्न खाेजेकाे बताए । ‘नियामक निकाय संरक्षक पनि हुन आफैंले लाइसेन्स प्रदान गरेको, आफ्नै नियमन तथा सुपरीवेक्षण मातहतमा रहेको नेप्सेलाई कुनै निकास नदिई जबरजस्ती प्रतिस्पर्धा गराउँछु भन्नु अख्तियार दुरूपयोग हो कि होइन ?’ उनले संसदमा प्रश्न उठाए । उनले नयाँ स्टक एक्सचेन्जका आकांक्षीहलाई नेप्सेकै शेयर बिक्री गर्नुपर्ने बताए । 

जनताको करबाट पालिएको संस्थालाई व्यक्तिगत लहडमा चलाउनु अपराध भएको उनको भनाइ थियो । धितोपत्र बोर्डले आइतबारसम्म खुला गरेको नयाँ स्टक एक्चेञ्जको लाइसेन्सका लागि ३ हिमालयन, नेशनल र अन्नपूर्ण कम्पनीले आवेदन दिएका छन् । यस्तै, वस्तु विनिमय अर्थात कमोडिटीतर्फ ४ कम्पनीले आवेदन दिएका छन् ।