दर्जा हबल्दारको, परिचय इन्सपेक्टरको

१२ वैशाख, जनकपुर । नक्कली प्रहरी बनेर आम सर्वसाधारण तथा व्यापारी ठग्ने धन्दा अनि तिनलाई प्रहरीले पक्राउ गरेका बारेमा त समाचार पढ्नु भएकै होला तर एक जना तल्लो दर्जाका प्रहरीले आफूलाई उपल्लो दर्जाको प्रहरी हुँ भन्दै तस्कर र व्यापारीसँग पैसा असुल्ने गरेको कथा भने बिरलै सुन्नमा आउँछ । हो, त्यस्तै सत्य कथाका पात्र हुन नेपाल प्रहरीका हबल्दार महेन्द्र प्रसाद महतो उर्फ एमपी राज महतो । सामाजिक सञ्जाल फेसबुक र साथीभाइहरु बीच एमपी राज महतोका नामले परिचय बनाएका प्रहरी हबल्दार महतोको यहाँ चर्चा गर्न लागिएको हो । 

"सन्तान थरी थरीका" भने झैं यिनले आफूलाई प्रहरी इन्स्पेक्टरको रुपमा तस्कर र व्यापारी माझ चिनाउने गरेका छन् । हालसालै त उनले आफूलाई डीएसपी समेत भन्न भ्याएको जनकपुर गणका एकजना डीएसपीले सुनाउँदै थिए । धनुषा जिल्ला प्रहरी कार्यालयमा दरबन्दी भए पनि उनी लामो समयदेखि संघीय प्रहरी कार्यालय जनकपुरमा काजमा कार्यरत छन् । कारण ठेकिएको दरबन्दीमा जाँदा प्रहरी हबल्दारको ड्रेस लगाउनु पर्ने डर उनलाई छ ।

प्रहरी स्रोतका अनुसार महतोले हबल्दारमा बढुवा भएदेखि प्रहरीको ड्रेस लगाएका छैनन् । ठाँटबाँटका साथ झिल्के भएर हिँड्ने उनी कहिले रारा पुग्छन् त कहिले मुगु अनि कहिले बर्दिया राष्ट्रिय निकुञ्ज ।  प्रहरीका हाकिमहरूसँग बाक्लो उठबस, फोटो सेसन अनि आईजी, एआईजी र डीआईजीसँग फोन गरेर अरूलाई देखाउने, तर्साउने अनि प्रभावित पार्ने उनको वर्षौँदेखिको धन्दा हो । सिपाहीका रुपमा उत्तम सुवेदी धनुषाको एसपी हुँदा घुमुवा रहेका महतोको सेक्स स्क्याण्डल बाहिरिएपछि केही समय नुवाकोट खेदिनु परेको थियो ।

बिगत ७-८ बर्षदेखि संघीय प्रहरी कार्यालय जनकपुरमा बसेर सिभिलमा घुम्ने उनले १० बर्ष यता प्रहरीको ड्रेस नै नलगाएको बताइन्छ । प्रहरीका ठूला हाकिमसँग बाक्लो उठबस गर्ने उनले प्रहरीका सिपाही देखि जुनियर अधिकृतसम्मलाई सरुवा बढुवा गराइदिन्छु र काज मिलाई दिने भन्दै पैसा उठाउने गरेका छन् । खास गरी एआईजीबाट हालै अवकाश लिएका उत्तम सुवेदी, आईजीपीबाट अवकाश पाएका धीरजप्रताप सिंह लगायतका हाकिमहरूसँग उनको नजिकको उठबस र उठतीपुठती चल्ने गरेको दावी समाचार स्रोतकाे छ ।

अझ सिंह आईजी हुँदा त उनले तराईका जिल्लाबाट आईजीका नाममा लाखौं असुलेर आतंक मच्चाएको स्रोतले बतायो । हाकिमका नाममा पैसा उठाउने तर थोरै रकम मात्र उनीहरूलाई दिएर धेरै आफैले राख्ने गरेको प्रहरीहरू बीच चर्चा हुने गरेको छ ।  करिब ९ लाख पर्ने रायल ईन्फिल्ड बाइक चढेर सानका साथ हिँड्ने, कार फेरि फेरि चढ्ने उनको आम्दानीको स्रोत के हो भनेर अन्य प्रहरीदेखि सर्वसाधारण पनि चकित हुने गरेका छन् । हबल्दार जागीरले त्यो हैसियत कसरी सम्भव हुन्छ ?

मूल घर सर्लाही भएपनि उनी जनकपुरको मुझेलियामा आलिशान तीन तले घरमा बस्ने गरेका छन् । तर त्यो घर खरिदको आर्थिक स्रोत के हो भन्ने जवाफ कसैसँग छैन् । हालसालै मात्र काठमाडौंमा पनि घडेरी जोडेका उनले अहिले आफूलाई प्रदेश डीआईजीको घुमुवाका रुपमा परिचय दिने गरेका छन् । तस्कर र व्यापारीहरूलाई नयाँ डीआईजीको घुमुवा आफू नै बस्ने तय भएको भन्दै लाइन मिलाएर पैसा असुल्न थालिसकेको बताइन्छ ।

अझ आईजीपी बसन्त कुँवरका लागि पनि मधेशमा पैसा उठाउने जिम्मा आफ्नै भएको भन्दै उनले गफ चुट्ने गरेका छन् । त्यसैका लागि उनले अर्का हबल्दार सुरेन्द्र ठाकुरलाई काज दरबन्दी फिर्ता गराइसकेका छन् । ठाकुर रमाना लिएर रातमाटे गण हिँडेका छन् । गफ लगाउन माहिर मानिएका महतोले मधेश प्रदेशका वैध अवैध क्रसर उद्योग, जुवा अखडा तथा गाईगोरु तस्करहरूबाट मोटो रकम महिनावारी हाकिमका नाममा असुल्ने गरेको बताइन्छ । चर्चित गोरु तस्कर शम्भू सिंहदेखि महोत्तरीका ठूला क्रसर व्यवसायी विजय साह, बेतन शर्मासँग उनको पुरानो सम्बन्ध रहेको बताइन्छ ।

अझ विजय साहसँग त उनको पाटर्नरसीप विजनेश नै रहेको आशंका प्रहरीहरुले गर्ने गर्छन । हरेक साँझ विजयको जनकपुरस्थित डिपोमा उनको बसउठ हुने गरेको छ । एकजना प्रहरी भन्छन्, एमपी राजलाई तपाई प्रहरी कार्यालयमा कहिल्यै भेटनु हुन्न, त्यही डिपोमा गयो भने चाहि पक्का भेट हुन्छ । क्रसर व्यवसायी बेतन शर्माको सिराहा, महोत्तरी र धनुषा लगायतका स्थानमा थूप्रै अवैध क्रसर उद्योग निर्वाध चलिरहेका छन् । त्यसको संरक्षण यिनै महतोले गर्ने गरेका छन् । त्यसबाहेक महोत्तरी , सर्लाही र धनुषामा सञ्चालन हुने ठूला जुवाखालबाट ठेक्‍कामा पैसा असुली पनि यिनै महतोले गर्ने गरेको बताइन्छ ।