भुक्तानी रोकेको भन्दै ठेकेदारहरूले कार्यकक्षमै थुनिदिए भौतिक मन्त्रालयका सचिव

१३ वैशाख, काठमाडौं । मधेश प्रदेशका भौतिक पूर्वाधार विकास मन्त्रालयका सचिवलाई ठेकेदारहरूले कार्यकक्षमै थुनेका छन् । 

काम पूरा भइसकेका विकास योजनाको रकम भुक्तानी नगरेको भन्दै आक्रोशित निर्माण व्यवसाय गर्दै आइरहेका ठेकेदारहरुले भौतिक पूर्वाधार विकास मन्त्रालयका सचिव कृष्णकुमार मिश्रलाई बुधबार दिउँसो कार्यालयमै थुनेका हुन् । 

निर्माण पूरा भएको डेढ वर्ष बित्दा समेत विभिन्न बहानामा सचिव मिश्रले हैरानी दिएर भुक्तानी रोकेको ठेकेदारहरुको भनाइ छ । उनीहरुले मिश्रलाई कार्यकक्षभित्र राखेर बाहिरबाट ताला लगाएर मन्त्रालय परिसरमा प्रदर्शन गरेका छन् । उनीहरुले सचिवको कार्यकक्ष अगाडि फोहोरसमेत थुपारेका छन् । 
पूरा भएको कामको पैसा नपाउँदा बैंकको ब्याजले उठवासको अवस्थामा पुगेको उनीहरुको भनाइ छ । हालसम्म विभिन्न ३८ वटा योजनाको ६० करोड रकम भुक्तानी गर्न पाउन नसकेको उनीहरुले बताए । प्रदेशमा उपभोक्ता समितिबाट गराइएका कामको मात्र झण्डै १ अर्ब रुपैयाँ भुक्तानी गर्न बाँकी रहेको जनाइएको छ ।