गण्डकीको मुख्‍यमन्त्रीमा कांग्रेसका सुरेन्द्रराज पाण्डेले गरे दाबी पेस

१४ वैशाख, पोखरा । गण्डकी प्रदेशको मुख्यमन्त्रीमा प्रदेश कांग्रेस संसदीय दलका नेता सुरेन्द्रराज पाण्डेले माओवादी केन्द्रसहित ८ दलको समर्थन लिएर प्रदेश प्रमुख पृथ्वीमान गुरुङसमक्ष दाबी पेश गरेका छन् । 

प्रदेश प्रमुख गुरुङले मंगलबार संविधानको धारा १६८ को उपधारा २ बमोजिम सरकार गठनका लागि गरेको दाबी आह्वानबमोजिम उनले बिहीबार दाबी पेस गरेका हुन् । 

दाबी पेस गर्ने समय आज दिउँसो ४ बजेसम्म दिइएको थियो । समयसीमाभित्रै पाण्डेले कांग्रेस, माओवादी र एकीकृत समाजवादीका प्रदेशसभा सदस्‍यलगायत बहुमत बढी मत जुटाएर सुरेन्द्रराजलाई मुख्यमन्त्री नियुक्त गर्न दाबी पेश गरेको प्रदेश प्रमुखको कार्यालयले जनाएको छ ।

उता लुम्बिनी प्रदेशमा पनि आजै मात्र माओवादी केन्द्र, एकीकृत समाजवादी लगायत दलका सदस्यहरुको समर्थनमा कांग्रेसका डिल्लीबहादुर चौधरीले मुख्यमन्त्रीका लागि दाबी पेस गरिसकेका छन् ।