सुरेन्द्रराज पाण्डे बने गण्डकीको मुख्यमन्त्री

१४ वैशाख, पोखरा । गण्डकी प्रदेशको मुख्यमन्त्रीमा कांग्रेस संसदीय दलका नेता सुरेन्द्रराज पाण्डे नियुक्त भएका छन् ।

प्रदेश प्रमुख पृथ्वीमान गुरुङले संविधानको धारा १६८ को उपधारा २ बमोजिम २ वा २ भन्दा बढी दलको समर्थनमा बहुमत जुटाएका प्रदेशसभा सदस्यका हैसियतमा पाण्डेलाई मुख्यमन्त्री नियुक्त गरेको जनाएका छन् । पाण्डेले पद तथा गोपनियताको शपथ भने शुक्रबार मात्र लिनेछन् । उनी याे प्रदेशमा पाचाैं मुख्यमन्त्री बनेका छन् ।

कांग्रेसका २७, माओवादीका ७ र मनाङबाट स्वतन्त्र सर्वसम्मत चुनाव जितेर एकीकृत समाजवादी प्रवेश गरेका राजीव गुरुङको हस्ताक्षरसहित पाण्डेले आजै मात्र मुख्यमन्त्री नियुक्त गर्न दाबी पेश गरेका थिए ।

नियुक्तिपछि संचारकर्मीहरुसँगको कुराकानीमा पाण्डले अहिलेको गठबन्धन प्रदेशसभाको अवधिभर रहने बताए । उनले मुख्यमन्त्रीमा माओवादी केन्द्रँग आलोपालो हुने समेत बताए । 

एमालेबाट मुख्य मन्त्री बनेका खगराज अधिकारी यही वैशाख ९ मा प्रदेशसभामा राखेको विश्वास मत लिने प्रस्ताव बहुमतले अस्वीकार गरेपछि पदमुक्त भएका थिए । सोपछि प्रदेश प्रमुख गुरुङले नयाँ सरकार गठनका लागि दाबी पेस गर्न आज दिउँसो ४ बजेसम्मका लागि समय तोकेका थिए ।