ओलीमाथि आक्रमणको प्रयास गर्नेलाई कारबाही गरः एमाले

१४ वैशाख, काठमाडौं । नेकपा एमालेले पार्टी अध्यक्ष केपी शर्मा ओलीमाथि आक्रमणको प्रयास गर्नेहरूलाई कारबाही गर्न माग गरेको छ । एमाले नेताहरूले बिहीबार उपप्रधानमन्त्री तथा गृहमन्त्री नारायणकाजी श्रेष्ठलाई भेटेर घटनामा संलग्नलाई कानुनी दायरामा ल्याएर कारबाही गर्न ध्यानाकर्षण गराएको छ । 

कानुन हातमा लिने प्रवृत्तिलाई प्रधानमन्त्री स्वयंले प्रोत्साहन गर्नु दुःखद भएको एमाले नेता राजन भट्टराईले बताए । बुधबार झापामा एमाले अध्यक्ष ओली सहभागी कार्यक्रममा कोशी नामकरणको विपक्षमा रहेका समूहले आक्रमण र हुलहुज्जत गरेको थियो ।

एमाले नेताहरूले चाबहिल सरस्वती नगरकी निरा पाण्डे आचार्यको हत्यामा संलग्नलाई पक्राउ गरी कारबाही गर्न माग गरेको छ । पाण्डेको ७ वैशाखमा आफ्नै पसलमा हत्या भएको थियो । तर अहिलेसम्म उनको हत्यामा संलग्नहरुलाई पक्राउ नगरिएको भन्दै एमालेले ध्यानाकर्षण गराएको छ ।