धेरै रेमिटेन्स भित्र्याउने सूचीमा हिमालयन बैंक र आईएमई

१४ वेशाख, काठमाडौं । नेपाल राष्ट्र बैंकले विदेशबाट धेरै रेमिटेन्स भित्र्याउने बैंक तथा कम्पनीहरुको सूची प्रकाशन गरेको छ ।

राष्ट्र बैंकले आफ्नो ६८औं बार्षिकोत्सवको अवसरमा आयोजित कार्यक्रममा धेरै रेमिट्यान्स भित्र्याउने कम्पनी र बैंकलाई बिहीबार काठमाडौंमा सम्मान समेत गर्यो । सो अवसरमा गभर्नर महाप्रसाद अधिकारीले ६ वटा कम्पनीलाई प्रमाणपत्रसहित सम्मान गरेका छन् ।

धेरै मात्रा रेमिट्यान्स भित्र्याउने वाणिज्य बैंकहरुमा हिमालयन बैंक पहिलो नम्बरमा परेको छ । हिमलायले कुल रेमिटेन्स आप्रवाहको १६.९६ प्रतिशत भित्र्याएको राष्ट्र बैंकले जनाएको छ । यस्तै, नेपाल एसबीआई बैंकले १६.७७ प्रतिशत र ग्लोबल आईएमई बैंकले १५.६५ प्रतिशत रेमिटेन्स भित्र्याएका छन् ।

रेमिटेन्स कम्पनीका तर्फबाट धेरै रेमिट्यान्स भित्र्याउनेमा आईएमई पहिलो बनेको छ । आईएमईले ३१.१२ प्रतिशत, सिटी एक्सप्रेसले १४.९२ र प्रभु मनी ट्रान्सफरले १०.९१ प्रतिशत रेमिटेन्स भित्र्याएको तथ्यांक राष्ट्र बैंकको छ । राष्ट्र बैंकले ति कम्पनी र बैंकले कति रकम भित्र्यायो भन्ने विषय भने खुलाएन ।