अबदेखि १२ कक्षा पास गरेकाले मात्र विदेश पढ्न जान एनओसी पाउने

१४ वैशाख, काठमाडौं । अबदेखि कक्षा १२ पास गरेका विद्यार्थीले मात्र विदेशमा पढ्न जान ‘नो अब्जेक्सन सर्टिफिकेट’ (एनओसी) पाउने भएका छन् ।

यसअघि विदेशमा गएर विद्यालय तह, भाषा र डिप्लोमा अध्ययन गर्न चाहनेलाई पनि दिइँदै आएको एनओसीको व्यवस्थालाई शिक्षा, विज्ञान तथा प्रविधि मन्त्रालयले खारेज गरिदिएको छ । विदेश अध्ययनमा जानेले मन्त्रालयबाट अनिवार्य रुपमा एनओसी लिनुपर्ने व्यवस्था छ । 

मन्त्रालयले हालै मात्र एनओसी दिनेबारे जारी गरेको ‘वैदेशिक अध्ययन स्वीकृतिसम्बन्धी निर्देशिका २०७९’मा यस्तो व्यवस्था गरिएको हो । फागुन १८ मै मन्त्रिपरिषदबाट स्वीकृत भएको निर्देशिका लागू भएको छ । नयाँ निर्देशिकालाई मन्त्रालयले हालै बेवसाइटमा राखेको छ ।

नेपालमा कक्षा १२ सम्मलाई विद्यालय तह मानेको छ । कक्षा १२ उत्तीर्ण नगरेका तर विदेशमा भाषा कोर्स गर्न जान खोज्ने विद्यार्थीलाई समेत निर्देशिकाले एनओसी दिन रोक लागाएको छ ।

विदेश अध्ययन गर्न जान चाहने विद्यार्थीका लागि मन्त्रालयकाे विदेश अध्ययन शाखाले एनओसी जारी गर्दै आइरहेको छ ।