आजदेखि राष्ट्रियसभा र प्रतिनिधिसभाका सचिवको पद खाली हुँदै

१५ वैशाख, काठमाडौं । शुक्रबारदेखि संघीय संसदमा दुई सचिवको पद खाली हुँदैछ । १६ वैशाख २०७५ मा प्रतिनिधिसभाको सचिवमा नियुक्त भएका गोपालनाथ योगी र राष्ट्रिय सभाका सचिव राजेन्द्र फुयालको पाँच वर्षे कार्यकाल शुक्रबार किन लागेको छ । संविधान अनुसार राष्ट्रपतिले सभामुखको सिफारिसमा प्रतिनिधि सभाको सचिव र राष्ट्रिय सभाको अध्यक्षको सिफारिसमा राष्ट्रिय सभाको सचिव नियुक्त गर्ने प्रावधान छ । 

संघीय संसदका महासचिव, प्रतिनिधिसभाका सचिव तथा राष्ट्रियसभाका सचिवको पारिश्रमिक, सेवाको शर्त र सुविधा सम्बन्धी ऐन अनुसार उनीहरुको पदावधि पाँच वर्षको हुन्छ । खाली हुने सचिव पदमा पदपूर्तिका लागि सभामुख देवराज घिमिरेले छलफल पनि चलाएका छन् । सचिव पदमा योग्यता पुगेका र योग्य व्यक्तिहरुको खोजि भइहेको छ । 

संघीय संसदका महासचिव, प्रतिनिधिसभाका सचिव तथा राष्ट्रियसभाका सचिवको पारिश्रमिक, सेवाको शर्त र सुविधा सम्बन्धी ऐनमा प्रतिनिधिसभा र राष्ट्रिय सभाको सचिवको योग्यता तोकिएको छ । जस अनुसार सचिव हुनका लागि ३५ वर्ष पूरा भएको हुनुपर्छ । नेपाल सरकारबाट मान्यता प्राप्त विश्वविद्यालयबाट कानून, प्रशासन, व्यवस्थापन, राजनीतिशास्त्र, अर्थशास्त्र वा समाजशास्त्र विषयमा स्नातकोत्तर उपाधि प्राप्त गरेको हुनुपर्ने व्यवस्था छ । 

सचिवको दुवै पद राजनीतिक रुपमा नियुक्त हुने भए पनि नियुक्त हुनु भन्दा तत्काल अगाडि कुनै राजनीतिक दलको सदस्य नरहेको हुनुपर्ने पनि योग्यतामा उल्लेख छ । राष्ट्रियसभा र प्रतिनिधिसभाको सचिव पदमा जान धेरै इच्छुक पनि देखिएका छन् ।  सचिव पदमा पठाउनदल निकट व्यक्तिहरुको आनाथाप हुने गरेको छ । यसका लागि शैक्षिक योग्यताभन्दा अर कुनै क्राइटेरीया बनाइएको छैन् ।