काठमाडौंको महानगरको २५ अर्ब बजेटमा ५ अर्ब मात्रै खर्च

१५ वैशाख, काठमाडौं । मेयर बालेन शाहका विभिन्न वक्तव्यबाजीका कारण चर्चामा रहेको काठमाडौं महानगपालिको पुँजीगत खर्च निकै कम देखिएको छ । महानगरपालिकाले सार्वजनिक गरेको चालु आर्थिक वर्षको प्रगती विवरणमा देखाइए अनुसार काठमाडौं महानगरपालिकाको खर्चको दर गत वर्षभन्दा खस्किएको छ । 

चलु आर्थिक वर्षका लागि महानरपालिकाले २५ अर्ब ४१ करोड ९६ लाख रुपैयाँको बजेट ल्याएको थियो । जसमा चैतसम्ममा  ५ अर्ब ४४ करोड ५ लाख रुपैयाँ मात्रै खर्च गर्न भएको छ । यो बजेट खर्च नहुने अवस्था आएपछि महानगरपालिकाले संशोधन गर्दै २२ अर्ब ५३ करोड ३३ लाखमा झारेको जनाएको छ ।  

संशोधित अनुमानअनुसार साउन यता ९ महिनाको कुल खर्च जम्मा २४ दशमलव १४ प्रतिशत मात्रै भएको छ । महानगरले अझै १७ अर्ब ९ करोड २८ लाख रुपैयाँ खर्च गर्न बाँकी छ । यो रकम आउँदो असारमहिनाभित्र खर्च हुने अवस्था छैन् । गत आर्थिक वर्षको पहिलो ९ महिनामा  महानगरले ३० दशमलव ३४ प्रतिशत खर्च गरेको थियो । गत वर्ष १८ अर्ब १५ करोड ७७ लाख रुपैयाँको बजेट ल्याइएका थियो । 

यो बजेट तत्कालिन मेयर विद्याशुन्दर शाक्यले संशोधन गरेर १६ अर्ब ५१ करोड ६८ लाखमा झारेका थिए । गत वर्ष चैत मसान्तसम्म ५ अर्ब १ करोड १३ लाख रुपैयाँ खर्च भएको थियो । ४३ करोड रुपैयाँको खर्च रकम भने केही बढेपनि चालु आवको बजेटको तुलनामा ९ महिनामा महागरको खर्चदर ६ प्रतिशतले कम विवरणमा उल्लेख छ ।