अलपत्र पारिएका भक्तपुर-नगरकोट सडकको ठेक्का रद्द गर्न माग

१५ वैशाख, काठमाडौं । नेकपा (एमाले)का सांसद गोकुल बास्कोटाले नगरकोट सडकखण्डको ठेक्का रद्द गर्न माग गरेका छन् । 

शुक्रबार बसेको प्रतिनिधिसभाको बैठकमा विशेष समयमा बोल्दै सांसद बास्कोटाले भक्तपुर–नगरकोट सडकको ठेक्का लिएर लामो समय बित्दा समेत पूरा गर्ने ठेक्का रद्द गरेर नयाँ ठेक्का लगाउन सरकारसँग माग गरे । 

उनले सडक खण्डलाई ‘घरबेटी मार्ग’को संज्ञा दिँदै प्रधानमन्त्री प्रचण्ड बसेकै घरबेटीले ठेक्का लिएर पटकपटक म्याद थप गर्दा समेत पूरा नगरेर स्थानीयलाई चरम असुविधा र अन्याय गरेको भन्दै ठेक्का रद्द गरेर नयाँ ठेक्कामा लगाई काम छिटो सक्न माग गरे । 

घरबेटी शरद अधिकारीको शैलुङ कन्ट्रक्सनले ठेक्का लिएको छ । पटकपटक म्याद थप हुँदा समेत निर्माण सम्पन्न नगर्दा स्थानीयलाई धुलाम्य र हिलाम्यका कारण वर्षौंदेखि सास्ती खेप्दै आएका छन् ।

वास्कोटाले आफ्नो पार्टी अध्यक्ष केपी शर्मा ओलीमाथि सरकारमा रहेका दलले नै कार्यकर्ता घुसपैठ गराएर झापा र पाँचथरमा आक्रमण गराएको आरोप लगाए । आक्रमणमा संलग्नलाई तत्काल कारवाही हुने वा नहुने भन्ने प्रधानमन्त्रीले सदनमा आएर जवाफ दिन माग गरे ।