संसदकाे १० विषयगत समिति गठन, संयुक्त समिति अझै अन्याैल

१५ वैशाख, काठमाडौं । संघीय संसदमा संसदीय विषयगत समिति गठन भएको छ । शुक्रबार सभामुख देवराज घिमिरेले संसदीय विषयगत १० वटा समिति गठन भएको जानकारी सदनलाई दिएका छन् । उनले समितिमा रहने सदस्यहरुको नाम संसदमा सुनाएका छन् । 

गत ४ मंसिरमा सम्पन्न चुनावपछिको प्रतिनिधिसभाको अधिवेशन भने पुस २५ गतेबाट शुरु भएको थियो । संसद गठन भएको झण्डै ५ महिनापछि समिति गठन गरिएको हो । राष्ट्रिय सभाको समेत गरी दुई वटा विषयगत समिति रहेका छन् । विषयगत समितिमा रहने सदस्यहरुको नाम पढेर सभामुखले सदनसमक्ष राखेको प्रस्ताव सर्वसम्मत रुपमा अनुमोदन भएको छ ।

प्रतिनिधिसभाको विषयगत समितिअन्तर्गत अर्थ समिति, अन्तर्राष्ट्रिय सम्बन्ध र पर्यटन समितिमा, उद्योग तथा वाणिज्य र श्रम तथा उपभोक्ता हित समिति, कानुन, न्याय तथा मानव अधिकार समिति, कृषि, सहकारी तथा प्राकृतिक श्रोत समिति, महिला तथा सामाजिक मामिला समिति, राज्यव्यवस्था तथा सुशासन समिति, पूर्वाधार विकास समिति, शिक्षा, स्वास्थ्य तथा सूचना प्रविधि समिति र सार्वजनिक लेखा समिति रहेको छ ।

संयुक्त समिति अन्तर्गत संसदीय सुनुवाई समिति र राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समिति छन् । संयुक्त समिति भने अझै गठन भएको छैन् । दलहरूबीच भागबण्डामा कुरा नमिल्दा गठन हुन नसेकेको हो ।