निरा पाण्डे हत्या घटनाको अनुसन्धान गर्न एआईजीको नेतृत्वमा समिति गठन

१५ वैशाख, काठमाडौं । राजधानीको कपनस्थित सरस्वतीगरमा यही वैशाख ७ गते दिउँसो आफ्नै पसलमा बाग्लुङकी निरा पाण्डेको विभत्स रुपमा हत्या भएको घटना अनुसन्धान गर्न प्रहरीले एआईजीको नेतृत्वमा समिति गठन गरेको छ । 

प्रहरीले केन्द्रीय अुनसन्धान ब्यूरोकी एआईजी किरण बज्राचार्यको नेतृत्वमा ११ सदस्यीय अनुसन्धान समिति गठन गरेको हो । पाण्डेको हत्यार पत्ता लगाउन नसकेको भन्दै सदनमा समेत आवाज उठेको बेला समिति गठन गरिएको हो । 

गठित समिति सदस्यमा जिल्ला प्रहरी परिसर काठमाडौँका एसएसपी दानबहादुर कार्की, उपत्यका अपराध अनुसन्धान कार्यालयका एसएसपी डा. मनोज केसी, ब्युरोकै एसएसपी दिनेश आचार्य, डीएसपी धर्मराज भण्डारी, प्रहरी वृत्त बौद्धका डीएसपी हरि बस्नेतलगायत छन् । 

दिउँसो आफ्नै भाँडा पसलमा शरीरमा २० भन्दा बढी ठाउँमा धारिलो हतियार प्रहार भएको अवस्था फेला परेकी ३५ वर्षीया निराको उपचारका क्रममा महाराजगन्जस्थित त्रिवि शिक्षण अस्पतालमा मृत्यु भएको थियो । 
त्यस घटनामा प्रहरीले अहिलेसम्म कसैलाई पनि पक्राउ गर्न सकेको छैन । हत्यारा पत्ता लगाउन पीडित परिवार, आफन्त र अधिकारीकर्मीहरुले राजधानीमा प्रदर्शन समेत गर्दै आएका छन् ।