बेलायतका राजा चार्ल्सको राज्याभिषेकमा सहभागी हुन परराष्ट्रमन्त्री साउद जाने

१७ वैशाख, काठमाडौं । बेलायतका राजा चार्ल्स तृतीयको राज्याभिषेकमा नेपालकोतर्फबाट परराष्ट्रमन्त्री एनपी साउदले नेपालको तर्फबाट सहभागिता जनाउने भएका छन् । राष्ट्रपति रामचन्द्र पौडेल नजाने भएपछि मन्त्री साउद नेपालको प्रतिनिधित्व गर्दै वैशाख २१ गते बेलायत जाने भएका हुन् । 

चार्ल्स तृतीयको राज्याभिषेक कार्यक्रम वैशाख २३ अर्थात मे ६ तारिखमा हुँदैछ । यसअघि राज्याभिषेकमा राष्ट्रपति पौडेल सहभागी हुने कार्यक्रम तय भएको थियो । 

मन्त्री साउद वैशाख २६ गते स्वदेश फर्किने कार्यक्रम तय भएको उनका स्वकीय सचिव दीपक जोशीले बताए । लामो समयको उपचारबाट आजै नेपाल फर्किने राष्ट्रपति पौडेललाई आराज चाहिने भएका कारण मन्त्री साउद बेलायत जाने कार्यक्र तय भएको परराष्ट्र मन्त्रालयकी प्रवक्ता सेवा लम्सालले बताइन् । 

गत सेप्टेम्बरमा महारानी एलिजावेथ द्वितीयाको निधनपछि उनका उत्तराधिकारी तथा बेलायती राजा चार्ल्स तृतीयको राज्याभिषेक समारोह तीन दिनसम्म मनाइँदैछ।