माइतीघर मण्डलामा धर्ना दिइरहेका महावीर पुन र सरकारबीच वार्ता सुरु

१७ वैशाख, काठमाडौं । अनुसन्धान, नवप्रवर्तन र आविष्कारका लागि बजेट छुट्याउनुपर्ने र राष्ट्रिय आविष्कार बोर्ड गठन गर्नुपर्ने लगायत ४ बुँदे माग राख्दै ३ दिनदेखि माइतीघरमा धर्ना बसेका राष्ट्रिय आविष्कार केन्द्रका संस्थापक महावीर पुनसँग सरकारले वार्ता थालेको छ ।

वार्ता सिंहदरबारस्थित रक्षा मन्त्रालयमा जारी छ । वार्तामा कानुन मन्त्रीको समेत जिम्मेवारीमा रहेका उपप्रधानमन्त्री तथा रक्षामन्त्री पूर्ण खड्का र वैज्ञानिक पुनसहित अन्य सहभागी छन् । 

महावीरसँगै धर्नामा राजनीतिक दलका पार्टीका नेता तथा सामाजिक अभियन्ताहरु पनि सहभागी भएका छन् । राजनीतिक दलहरुले समेत आन्दोलनमा ऐक्यवद्धता जाहेर गर्ने क्रम बढेको छ । नेपाली कांग्रेसका महामन्त्री विश्वप्रकाश शर्माले आइतबार मात्र पुनसँग प्रधानमन्त्रीले तत्काल संवाद गर्न आग्रह गरेका छन् ।

पुन संचालक रहेको राष्ट्रिय आविष्कार केन्द्रले बनाएको ‘यात्री’ मोटरसाइकल कानून अभावकै कारण दर्ता र नेपाली वैज्ञानिकहरुले बनाएका वस्तु तथा सवारी दर्ता हुन सकिरहेको छैन । कानूनको अभावमा देशभित्र निर्मित सवारीलाई सडकमा ट्राफिकले बारम्बार दुःख दिने काम गरिरहेको पुनले बताएका छन् । उनले देशको अर्थतन्त्र विकासका लागि स्वदेशी उत्पादन र उपभोग, मेशिनरी उत्पादन लगायत कार्यका लागि कुल बजेटको १ प्रतिशत बजेट विनियोजनको माग गर्दै आएका छन् ।