नेपाल बैंक र राष्ट्रिय वाणिज्य बैंक मर्जरका लागि कार्यदल गठन

१७ वैशाख, काठमाडौं । दुई सरकारी वाणिज्य बैंक मर्जरको सम्बन्धमा अर्थ मन्त्रालयले कार्यदल गठन गरेको छ । कार्यदलको संयोजक  मन्त्रालयको वित्तीय क्षेत्र व्यवस्थापन महाशाखा प्रमुख भुपाल बराल तोकिएका छन् । 

कार्यदलले यी दुई बैंकको मर्जर सम्बन्धमा अध्ययन विश्लेषण गर्ने अख्तियारी पाएको छ । पछिल्लो समय निजी क्षेत्रको बैंककै अधिकतम चुक्ता पुँजी ३५ अर्ब हाराहारीमा पुग्न थालेपछि सरकारी बैंकबीच पनि मर्जरको तयारी सुरु भएको छ ।

न्यूरोडस्थित भूगोलपार्कमा मुख्यालय रहेको नेपाल बैैंकको चुक्ता पुँजी १४ अर्ब ६९ करोड रुपैयाँ  रहेको छ। बैंकले आर्थिक वर्षको तेस्रो त्रैमासिकसम्ममा २२९ अर्ब रुपैयाँ निक्षेप संकलन गर्न सफल भएको छ भने १७३ अर्ब रुपैयाँ कर्जा विस्तार गरेको छ । 

यस्तै, रामशाह पथस्थित मुख्यालय रहेको राष्ट्रिय वाणिज्य बैंकको चुक्ता पुँजी १५ अर्ब ६३ करोड रहेको छ । गत चैत मसान्तसम्ममा बैंकले ३०२ अर्ब निक्षेप संकलन गरी २२५ अर्ब रुपैयाँ कर्जा प्रवाह गरेको छ ।