महाबीर पुन र सरकारबीचको वार्ता सहमति नजिक

१७ वैशाख, काठमाडौं । माइतीघर धर्नामा बसेका राष्ट्रिय आविष्कार केन्द्रका संस्थापक महावीर पुन र सरकारबीचको छलफल सहमति नजिक पुगेको छ । दुवै पक्षबीच वार्ता टोली गठन गर्ने निर्णय भएको भएको छ ।  आइतबार कानुन मन्त्रलयकोसमेत जिम्मेवारी लिएका उपप्रधानमन्त्री तथा रक्षामन्त्री पूर्णबहादुर खड्का, मुख्य सचिव शंकरदास वैरागी र महावीर पुनको टोलीबीच रक्षा मन्त्रालयमा छलफल भएको थियो ।

छलफलपछि पुनले सकारात्मक कुराकानी भएको जानकारी दिएका छन् । उनले अहिले दुई पक्षबीच  बसेर कसरी अगाडि जाने भनेर निर्णय भएको उनले बताए । आज बेलुका पाँच बजेभित्र टोली गठन गर्ने निर्णय भएको र आज भ्याइयो भने रातारात छलफल गर्ने, नभ्याए भोलिसम्म आन्दोलनका माग पूरा गर्ने निर्णय भएको पुनले बताए । उनले छलफल एकदमै सकारात्मक रहेको र आफूहरुले रक्षामन्त्रीसँग वार्ता गर्दागर्दै दुई पटक प्रधानमन्त्रीले फोन गरेको पुनले बताए । 

पुनले अनुसन्धान, नवप्रवर्तन र आविष्कारको क्षेत्रमा राज्यले लगानी बढाउनुपर्ने माग गर्दै काठमाडौंको माइतीघर मण्डलमा अनिश्चितकालीन धर्ना सुरु गरेका थिए । पुनले सरकारले आफ्ना माग पूरा नगरेसम्म सडकमै सुतेर धर्ना दिने घोषणा गरेका थिए । सरकारले अनुसन्धान, नवप्रवर्तन र आविष्कारको क्षेत्रलाई प्राथमिकतामा राखेर कानुन, नीतिगत व्यवस्था र बजेटको प्रबन्ध नगरेसम्म धर्ना नरोकिने उनले बताएका थिए ।