बैंक लक्षित अराजक गतिविधि गर्नेलाई कारवाहीको दायरामा ल्याउन गृहको निर्देशन

१७ वेशाख, काठमाडौं । बैंक तथा वित्तीय संस्थाहरुमाथि निरन्तर आक्रमण र धम्कीको गतिविधि भइरहेको जनाउँदै गतिविधिमा संलग्नलाई कारवाहीको दायरामा ल्याउन गृह मन्त्रालयले स्थानीय प्रशासनलाई परिपत्र गरेको छ । 

लिएको ऋण नतिर्नेमात्र होइन, अरुलाई समेत नतिर्न सार्वजनिक आह्वान गर्दै हिँड्ने अराजक गतिविधिलाई सरकारले सुनेको नसुन्यै गरिरहेको भन्दै सरोकारवालाहरुले आलोचना भइरहेको बेला गृहले उपत्यकाभित्र मात्र नभएर बाहिरी क्षेत्रमा समेत घट्न नदिन प्रत्येक जिल्ला प्रशासन कार्यालयहरुलाई पत्र पठाएको हो । परिपत्र गरिएको कुरा गृहसचिव विनोद प्रकाश सिंहले पुष्टि गरेका छन् । 

बैंक तथा वित्तीय संस्था एवम् कर्मचारीहरुमाथि कुनैपनि खालको आक्रमण हुनबाट रोक्न र भएमा तत्काल कारबाही गर्न स्थानीय प्रशासनलाई निर्देशन गरेको उनको भनाइ छ ।

बैंक तथा वित्तीय संस्था परिसंघ नेपाल, नेपाल बैंकर्स संघ, विकास बैंक संघ लगायतका वित्तीय संघरसंगठनहरु सरकारसँग सुरक्षाको माग गर्दै आइरहेका छन् । 

मेडिकल व्यवसायी झापाका दुर्गा प्रसाइँले लघुवित्त, बैंकका ऋणीलाई पैसा नतिर्न र किस्ता उठाउन आउने कर्मचारीलाई कालोमोसो दलेर लखेट्न भन्दै सार्वजनिक रुपमा भाषण गरेपछि प्रशासन सतर्क भएको हो ।