नेपाल बैंक र राष्ट्रिय बाणिज्य बैंकलाई गाभेर देशकै ठूलो बैंक बनाइने

१८ बैशाख, काठमाडौं ।  सरकारले  वित्तीय क्षेत्रमा ठूलो हिस्सा ओगटेका नेपाल बैंक लिमिटेड र राष्ट्रिय वाणिज्य बैंकलाई मर्जरमा लगेर एउटै बैंक बनाउने भएको छ ।  दुई ठूला बैंकहरुलाई गाभेर देशकै ठूलो बैंक बनाउने नीति अनुसार गाभ्न लागिएको हो । 

यी दुई बैंक मर्जरको प्रक्रिया अगाडी बढाउन कार्यदलसमेत बनाइएको छ । दुबै बैंकमा रहको समग्र आर्थिक दायित्व, कर्मचारी व्यवस्थापन लगायतका विषयमा प्रतिवेदन तयार गर्न कार्यदल बनाइएको हो । 

अर्थमन्त्रालयले दुई सरकारी वाणिज्य बैंक मर्जरको सम्बन्धमा कार्यदल बनाएको हो । यी दुई बैंकको मर्जर सम्बन्धमा अध्ययन विश्लेषण गर्न कार्यदल बनेको मन्त्रालयले जानकारी दिएको छ ।  कार्यदलको संयोजक मन्त्रालयको वित्तीय क्षेत्र व्यवस्थापन महाशाखा प्रमुख भुपाल बराललाई तोकिएको छ । नेपाल राष्ट्र बैंकको विग मर्जर नीति अनुसार यी बैंकहरुलाई पनि गाभेर एक बनाउन लागिएको हो ।

राष्ट्र बैंकका गभर्नर महाप्रसाद अधिकारीले सरकारी स्वामित्वका दुई ठूला बाणिज्य बैंकलाई पनि गाभेर एक बनाउनुपर्ने धारणा राख्दै आएका थिए । यी दुई बैंक मर्जर भएपछि देशकै ठूलो बैंक बन्ने भएको छ । राष्ट्र बैंकले बैंक तथा वित्तीय संस्थालाई मौद्रिक नीतिमा आउनुभन्दा अघि नै मर्जर जान दवाव दिएको थियो । राष्ट्र बैंकले खासगरी १३ वटा बैंकलाई मर्जरमा जान बढी दवाव दिएको थियो ।