रास्वपाले गर्यो ३६ विभाग गठन, स्वर्णिमलाई अर्थ नीति र ताेसिमालाई स्वास्थ्यको जिम्मा

१८ वैशाख, काठमाडौं । संसदको चौथो दल राष्ट्रिय स्वतन्त्र पार्टी (रास्वपा)ले ३६ वटा विभाग गठन गरेको छ । बसुन्धरास्थित पार्टी कार्यालयमा सोमबार बसेको केन्द्रीय समिति बैठकले विभाग गठन गर्दै प्रमुखहरु तोकेको महासचिव मुकुल ढकालले जानकारी दिए । 

सोही बैठकले पार्टी सभापति रबि लामिछानेलाई पार्टीको संसदी दलको नेता चयन गर्न दललाई सिफारिस गर्ने निर्णय गरेको छ । दलको आजै बस्ने बैठकले लामिछानेलाई नेता चयन गर्नेछ । 

गठित विभागका प्रमुखहरु समेत तोकिएका छन् । महासचिव मुकुल ढकालका अनुसार उनलाई नीति तथा विचार विभाग र प्रशिक्षण विभाग प्रमुखको जिम्मेवारी दिइएको छ भने अर्थशास्त्री समेत रहेका सांसद डा. स्वर्णिम वाग्लेलाई अर्थ नीति विभागका प्रमुखको जिम्मेवारी तोकिएको छ ।

यस्तै, कविन्द्र बुर्लाकोटीलाई संगठन विभाग, विपिन आचार्यलाई अभियान तथा प्रचार विभाग, शिशिर खनाललाई अन्तर्राष्ट्रिय सम्बन्ध विभाग, डोलप्रसाद अर्याललाई प्रवास नेपाली सम्पर्क विभाग, कुशुम महर्जनलाई मानवीय विकास प्रवर्द्धन विभाग, विष्णु श्रेष्ठलाई केन्द्रीय आरएटी विभाग, खुश्वु सरकार श्रेष्ठलाई नेतृत्व क्षमता तथा मानव संशाधन विकास विभाग, दीपक बोहरालाई जनसम्पर्क विभाग, हरि ढकाललाई भ्रष्टाचार निवारण तथा सुशासन प्रवर्द्धन विभाग, लिमा अधिकारीलाई आर्थिक व्यवस्थापन विभाग, डा. चन्द्रा कार्कीलाई गुनासो व्यवस्थापन विभाग, डा. अरनिको पाँडेलाई विकास योजना तथा नीति तर्जुमा विभाग, मनिष झालाई तथ्यांक अनुसन्धान तथा अभिलेखीकरण विभाग र सार्वजनिक लेखा समीक्षा विभाग,  गणेश कार्कीलाई विधेयक मन्थन विभाग, अर्जुन अधिकारी गैरआवासीय नेपाली सम्पर्क विभाग, सोविता गौतमलाई कानुन तथा न्याय विभाग, सुमना श्रेष्ठलाई शिक्षा विभाग र विज्ञान, सञ्चार तथा सूचना प्रविधि विभागको जिम्मा दिइएको छ । 

यस्तै, डा. तोसिमा कार्कीलाई स्वास्थ्य तथा जनसंख्या विभाग र युवा तथा खेलकुद विभाग, अशोक चौधरीलाई कृषि विभाग र सहकारी विभाग, शिशिर खनाललाई पर्यटन तथा संस्कृति विभाग, विराजभक्त श्रेष्ठलाई मुद्रा तथा पुँजीबजार  विभाग, गणेश पराजुलीलाई उद्योग तथा वाणिज्य विभाग, असिम शाहलाई श्रम तथा उपभोक्ता हित विभाग, शिव नेपालीलाई यातायात विभाग, निशा डाँगीलाई पूर्वाधार विकास अनुगमन विभाग, सन्तोष परियारलाई मानवअधिकार विभाग, विनिता कठायतलाई वन, वातावरण तथा प्राकृतिक स्रोत साधन विभाग र लक्ष्मी तिवारीलाई महिला तथा सामाजिक विकास विभागको जिम्मेवारी दिइएको छ । 

बैठकले सरकारलाई दिँदै आएको समर्थन फिर्ता लिनेबारे निर्णय लिने बताइएपनि यसबारे बैठकमा कुरा मात्र उठेको बैठकमा सहभागी एक नेताले बताए । पार्टी अहिलेजसरी नबस्नेमा नेताहरु एकमत देखिएको उनले बताए । निर्णय लिन आउँदो शुक्रवार बैठक बस्ने बताइएको छ ।