निमावि शिक्षकको परीक्षामा करिब ७९ प्रतिशत अनुत्तीर्ण

१९ वैशाख, काठमाडौं । शिक्षक सेवा आयोगले सार्वजनिक गरेको निमावि तह, तृतीय श्रेणी शिक्षक पदको नतिजामा करिब ७९ प्रतिशत परिक्षार्थी अनुत्तीर्ण भएका छन् । कुल परिक्षार्थी मध्ये २१ प्रतिशतले मात्र सफल नतिजा निकालेका छन् ।

आयोगले गत वैशाख ९ गते खुला प्रतियोगितात्मक लिखित परीक्षा लिएको थियो । यसको नतिजामा २०.७४ प्रतिशत मात्रै उत्तीर्ण भएका छन् । 

परीक्षामा सहभागी ६७ हजार १८० मध्ये १३ हजार ९३९ ले सामान्य परीक्षा उत्तीर्ण गरेका छन् । आयोगले सार्वजनिक गरेको नतिजा अनुसार कोशी प्रदेशमा सहभागी भएका १५ हजार ५९७ मध्ये ३ हजार ८५ जना उत्तीर्ण भएका छन् । 

मधेश प्रदेशमा सहभागी ६ हजार २१० जना मध्ये एक हजार एक सय, बागमती प्रदेशमा ११ हजार ६०६ सहभागी मध्ये दुई हजार ८०३, गण्डकी प्रदेशमा ११ हजार ७२८ जना मध्ये दुई हजार ८५५ जना उत्तीर्ण भएका छन् ।

त्यस्तै लुम्बिनी प्रदेशमा ६ हजार ६७२ सहभागी मध्ये एक हजार १८१ जना, कर्णाली प्रदेशमा सहभागी ६ हजार ५९८ मध्ये एक हजार २३१ जना र सुदूरपश्चिम प्रदेशमा सहभागी ८ हजार ७६९ मध्ये एक हजार ६८४ जना उत्तीर्ण भएका छन् ।