कुल बजेटको १ प्रतिशत अन्वेषणका लागि छुट्याउने मन्त्री शर्माको आश्वासन

१९ वैशाख, काठमाडौं । संचार तथा सूचना प्रविधिमन्त्री रेखा शर्माले सरकारले आगामी आर्थिक वर्षको बजेटमा कूल बजेटको एक प्रतिशत बजेट अन्वेषण तथा नवप्रवर्तनका लागि छुट्याउने आश्वासन दिएकी छन् । 

‘राष्ट्रिय सूचना तथा सञ्चार प्रविधि दिवस २०८०’को अवसरमा मंगलबार काठमाडौंमा आयोजित कार्यक्रममा प्रमुख अतिथकाे रूपमा सम्बोधन गर्दै मन्त्री शर्माले यस्तो आश्वासन दिएकी हुन् । 

उनले सोमबार आविष्कार महावीर पुनसँग भएको ७ बुँदे सहमतिले देशमा सूचना प्रविधिको क्षेत्रमा आविष्कार र  विकासकाे ढाेका खाेल्ने विश्वास सरकारले लिएको बताइन् । ‘सोमबार आविष्कार महाविर पुनसँग सरकारले गरेको सम्झौता सरकारलाई मात्र नभई सम्पूर्ण नागरिकका लागि खुशी कुरा हो’ उनले भनिन्, ‘सम्झौता पूर्णरुपमा कार्यान्वयन गर्न सरकारको तर्फबाट प्रतिवद्धता व्यक्त गर्दछु ।’

यस्तै उनले आगामी आवभित्र देशका सबै स्थानीय तहमा ब्रोड ब्याण्ड संचालन गर्ने र इन्टरनेटको क्षमतालाई वृद्धि गर्ने गरी सरकारले काम गरिरहेको जानकारी दिइन् । सबै सरकारी वेभसाइटलाई एकीकृत रुपमा संचालन गर्ने काम भइरहेको र यसबाट सूचनाको क्षेत्रमा भइरहेको खर्च भारी मात्रामा कटौती हुने उनको भनाइ छ । 

सरकारी तथा गैरसरकारी क्षेत्रका वेभसाइटमा देखा पर्ने समस्या समाधानका लागि सरकारले साइबर सुरक्षा केन्द्र स्थापना गर्न नीति र कार्यक्रम बनाइरहेको समेत बताइन् ।