जग्गाको वर्गीकरण नसकिँदै खुलाइयो घरजग्गाको कित्ताकाट

१९ वैशाख, काठमाडौं । सरकारले घर जग्गाको कित्ताकाट खुला गरेको छ । आज बसेको मन्त्रिपरिषद् बैठकले औपचारिक रुपमा घरजग्गा कित्ताकाट खुला गर्ने निर्णय गरेको हो । 

यसअघि बसेको मन्त्रिपरिषद् बैठकले सो निर्णय गरेपनि यसबारे अध्ययन गर्न मन्त्रिपरिषद् अन्तर्गतको आर्थिक तथा पूर्वाधार समितिलाई जिम्मेवारी दिएको थियो ।

भूउपयोग नीतिअनुरुप जग्गाको वर्गीकरण गर्ने जिम्मा स्थानीय तहलाई दिइएको थियो । तर अधिकांश स्थानीय तहले वर्गीकरणको काम पूरा नगर्दा कित्ताकाट रोकिएको थियो । वर्गीकरणको काम क्रमशः गर्दै जाने र पूरा भएका क्षेत्रमा घर जग्गाको कित्ता खुलाएको हो ।

नयाँ नीति अनुसार साढे २ आना क्षेत्रफलसम्म जग्गा टुक्र्याउने मिल्नेछ । यसअघि टुक्र्याउन नमिल्ने नियमका कारण जग्गा कारोबार तथा अंशबण्डाका काम ठप्प थियो ।

जग्गा व्यापारमा लगानी गर्नेहरु कित्ताकाट बन्द भएका कारण मारमा पर्दै आएका छन् । कित्ताकाट रोकिएका कारण प्लटिङ गरिएको जग्गा बिक्री गर्न नपाएर ऋण डुबेको गुनासो घरजग्गा कारोबारीहरुले गर्दै आएका छन् ।

सरकारले अर्थतन्त्रमा संकट उत्पन्न हुुनुमा घरजग्गा कारोबार बन्दलाई एक मान्दै आएको छ ।  कित्ताकाट खुल्ने निर्णयले मालपोतमार्फत राजश्व संकलनमा वृद्ध हुने विश्वासको सरकारको छ ।