बझाङमा यार्सागुम्बा खोज्न गएकी महिला हिम पहिरोमा बेपत्ता

१९ वैशाख, काठमाडौं । बझाङमा यार्सागुम्बा संकलन गर्न गएकी एक महिला हिम पहिरोमा परी बेपत्ता भएकी छन् । जिल्लाको सुर्मा गाउँपालिका–१  देवडीकी ३३ वर्षीया झल्लादेवी बोहरा बेपत्ता भएकी हुन् ।

छोरासहित उनी सुर्मा गाउँपालिकाको पार्थी हिमालको वनमा यार्सा खोज्न केही दिनअघि गएकी थिइन् । छाेरा भने सकुशल रहेकाे बताइएकाे छ ।

हिम पहिरो खस्दा भाग्ने क्रममा उनी बेपत्ता भएको स्थानीय दिपेन्द्र बोहराले बताए । घटनास्थलतर्फ जाने तयारी भइरहेको सुर्मा गाउँपालिकास्थित प्रहरी चौकीले जनाएको छ । 

यसैबीच आज दिउँसो ३ बजेतिर दार्चुलाको व्यास गाउँपालिका–१ बोलिनमा गएको हिमपहिरोमा यार्सा गुम्बा टिप्न गएका दर्जनको संख्यामा मानिसहरु पुरिएको आशंका गरिएको छ ।

खोजीका लागि दार्चुलाको सशस्त्र प्रहरी बलको ५० नम्बर गुल्म छाङरूबाट डिएसपीको कमान्डमा ३० जनाको टोली घटनास्थलतर्फ गइरहेको बलका सहायक प्रवक्ता डिएसपी शैलेन्द्र थापाले बताए ।