मिटरब्याजीमाथि कारवाही गर्ने कानुन ल्याउन अध्यादेश सिफारिस

१९ वैशाख, काठमाडौं । सरकारले मिटरब्याजीसँग सम्बन्धित कानुन बनाउनका लागि अध्यादेश ल्याउने निर्णय गरेको छ । मन्त्रिपरिषद्को मंगलबारको बैठकले मिटरब्याजीसँग सम्बन्धित अध्यादेश राष्ट्रपति कार्यालयका लागि सिफारिस गर्ने निर्णय गरेको हो ।

सरकारकी प्रवक्ता एवं सञ्चार तथा सूचना प्रविधिमन्त्री रेखा शर्माले मन्त्रिपरिषद्बाट मिटरब्याजीसँग सम्बन्धित समस्यालाई कानुनी रूप दिन अध्यादेश राष्ट्रपति रामचन्द्र पौडेलसमक्ष पठाउने निर्णय गरेको जानकारी दिइन् । अध्यादेश राष्ट्रपति समक्ष पठाइएको छ । 

मधेशका विभिन्न जिल्लाबाट आएका मिटरब्याजीपीडित काठमाडौंमा धर्ना बसिरहेका बेला मन्त्रिपरिषद्ले अध्यादेश ल्याउने निर्णय गरेको हो । मन्त्रिपरिषद्बाट सिफारिस अध्यादेश राष्ट्रपतिले जारी गर्नुपर्ने संवैधानिक व्यवस्था छ । संघीय संसद्को अधिवेशन नरहेको बेला सरकारले तत्काल केही कानुनी व्यवस्था गर्नका लागि अध्यादेश ल्याउन सक्ने संवैधानिक व्यवस्था रहेको छ ।