सुडानमा थप एक हप्ता युद्धविराम, शान्ति वार्ता हुने

२० वैशाख, काठमाडौं । दुई हप्तादेखि सुडानमा द्वन्द्वरत पक्ष एक हप्ता युद्धविराम गर्न सहमत भएका छन् । सरकारी सेना र प्रतिद्वन्द्वी अर्धसैनिक बल आरएसएफबीच मे ४ तारिखदेखि एक हप्तासम्म युद्ध विराम गर्ने सहमति भएको बीबीसीले जनाएको छ ।

यसबीचमा दुवै पक्षबीच शान्ति वार्ता हुनेछ । दक्षिण सुडानले दुवै पक्ष शान्ति वार्ताका लागि आ–आफ्ना प्रतिनिधि पठाउन तयार भएको जनाएको छ ।

यसअघि पनि युद्धविरामको सम्झौता भएपनि दुवैले एकअर्कालाई सम्झौता तोडेको आरोप लगाउँदै आक्रमण जारी राखेका थिए । राजधानी खार्तुम लगायत मुख्य शहरी क्षेत्रमा भएको आक्रमणमा सयौ सर्वसाधारणको ज्यान गएको थियो ।

सुडानमा सेना र अर्धसैनिक बलबीच १८ दिन अगाडिदेखि लडाइँ जारी छ । संयुक्त राष्ट्रसंघका अनुसार यो अवधिमा एक लाख भन्दा बढीले देश छाडिसकेका छन् । ५ सय भन्दा बढीको मृत्यु भइसकेको छ भने ४ हजार बढी घाइते भएका छन् ।

लडाइँ जारी रहेमा सुडान ठूलो संकटमा पर्ने संयुक्त राष्ट्र संघीय कार्यालयले जनाउँदै आएको छ । द्वन्द्व राेकेर तत्काल वार्तामा बस्न दुवै पक्षसँग अपिल गरेकाे छ ।

द्वन्द्वका कारण अमेरिका, युरोपियन मुलुक, बेलायत, अष्ट्रेलिया, चीन, जापानलगायत राष्ट्रहरुको आफना कुटनीतिक नियोगका कार्यालय बन्द गरेर कर्मचारीलाई अन्यत्र सारिसकेका छन् भने सुडानका करिब ५ लाख नागरिकले देश छाडिसकेको अन्तर्राष्ट्रिय संचारमाध्यमहकरुले जनाएका छन् । लामो समयदेखि द्वन्द्वको चपेटामा परेर आर्थिक संकट व्यहोरिरहेको सुडान थप संकटमा परेको छ ।