बजेटकाे मुखमा पोखरेललाई अर्थ सचिवकाे जिम्मेवारी

२१ वैशाख, काठमाडौं । सरकारले सचिवहरुको सरुवा गरेको छ । आगामी आर्थिक वर्षको बजेट प्रस्तुत गर्ने समयमा एक महिना पनि बाँकी नरहेको अवस्थामा सरकारले अर्थसचिवको पनि सुरूवा गरेको छ । 

बुधबार बसेको मन्त्रिपरिषद् बैठकबाट अर्थसचिव तोयम रायालाई भने उपराष्ट्रपति कार्यालयमा सरुवा पठाएर अर्थमा प्रधानमन्त्री तथा मन्त्रिपरिषद् कार्यालयका अर्जुन पोखरेललाई ल्याएको छ । रायलाई अर्थ मन्त्रालयमा ल्याएको ६ महिना पनि नपुग्दै उनलाई सरूवा गरिएको हो ।

बजेटको मुखमा अर्थसचिवको जिम्मेवारीमा आएको पोखरेल प्रधानमन्त्री तथा मन्त्रिपरिषद् कार्यालयमा आउनुअघि पनि अर्थसचिवको लागि निकै पहल गरेका थिए । 

उनी विगतमा आन्तरिक राजश्व विभाग, भन्सार ‍विभाग, त्रिभुवन विमानस्थलको भन्सार कार्यालयमा लगायतका अर्थ मातहतका निकायमा रहेर काम गरिसकेका छन् । २०५१ सालमा अधिकृत स्तरको सेवाबाट निजामती सेवामा प्रवेश गरेका पोखरेल २०७७ सालमा सचिवमा बढुवा भएका हुन् ।