सत्ता गठबन्धनले बजेट र नीति तथा कार्यक्रममा साझा प्याकेज बनाउने

२१ बैशाख, काठमाडौं ।  सत्तारुढ गठबन्धनमा रहेका दलहरुले सरकारका न्यूनतम् साझा कार्यक्रम जस्तै आगामी आर्थिक वर्षको बजेट र नीति तथा कार्यक्रममा पनि सबै दलहहरुले लिएका एजेण्डलाई प्याकेज बनाएर समावेश गराउने भएका छन् । उनीले आगामी बजेट र नीति तथा कार्यक्रम महत्व दिएर छलफल अगाडी बढाउने र कार्यक्रम बनाएर साझा प्याकेजका रुपमा  बजेट र नीति तथा कार्यक्रममा समावेश गराउने भएका छन् ।  

गठबन्धनले सेवाप्रवाह, सुशासन र समृद्धिलाई केन्द्रमा राखेर आगामी बजेट ल्याउने गरी छलफल थालेको छ । नीति तथा कार्यक्रम र बजेटबारे बुधबार पहिलोपटक गठबन्धन बैठकमा दलहरूले छलफल गरेका थिए । यसलाई निरन्तरता दिन भोली शुक्रबार पनि बैठक डाकिएको छ । बैठकमा विस्तृत छलफल गरेर साझा कार्यक्रमको प्याकेज बनाउन लगाइने भएको छ । 

बुधबारको बैठकमा प्रधानमन्त्री पुष्पकमल दाहाल प्रचण्डले नीति तथा कार्यक्रम र बजेटमा साझा सुझाव तयार पार्नुपर्ने बताएका  थिए । अहिलेको चुनौतीको सामना गर्ने गरी बजेट बनाउनका लागि  सत्ता गठबन्धनमा रहेका दलहरुबीच साझा धारणा बनाउनुपर्ने उनको भनाइ थियो । साझा धारणा तयार गरेर नीति तथा कार्यक्रम र बजेटमा समावेश गरी कायान्वयमूूखी बनाउने दलहरुको तयारी छ 

आगामी बजेट र नीति तथा कार्यक्रम जनतालाई परिवर्तनको अनुभूति पाउने गरी बनाउनुपर्नेमा सबै दलको जोड छ । देशमा केही हुँदै छ भन्ने सन्देशसहित उचित डेलिभरी, सुशासन र समृद्धिमा सरकार गम्भीर भएर लागेको हुनगरी साझा कार्यक्रम बनाएर बजेटमा राख्नुपर्ने विषयमा दलहरु सहमत छन् । बैठकमा गठबन्धनका शीर्ष नेताहरुले पनि जनताका आशा, अपेक्षा सम्बोधन गर्ने गरी नीति तथा कार्यक्रम र बजेट बन्नुपर्नेमा जोड दिएका छन् ।

कांग्रेस सभापति शेरबहादुर देउवाले अर्थतन्त्र सुधार गर्दै जानुपर्ने र देशको अवस्था र जनताको अपेक्षालाई ख्याल गरेर साझा कार्यक्रम तयार गर्नुपर्ने भन्दै न्यूनतम साझा कार्यक्रमका आधारमा सबैका सुझाव समेटेर कार्यान्वयन गर्ने खालको कार्यक्रम बनाउनुपर्नेमा जाड दिएका छन् । जनताका आशा र अपेक्षा धेरै रहेको भन्दै त्यसलाई सम्बोधन गर्ने गरी नीति तथा कार्यक्रम र बजेट आउनुपर्नेमा गठबन्धन दलहरु सहमत भएपछि अर्थतन्त्रलाई उकास्ने र जनतालाई प्रत्यक्ष अनुभूति हुने गरी साझा प्याकेज बनाउने बताइएको छ ।