स्थानीय तहको बजेट कटौती नगर्न प्रधानमन्त्रीसँग एमाले अध्यक्ष ओलीको आग्रह

२१ वैशाख, काठमाडौं । नेकपा एमालेका अध्यक्ष केपी शर्मा ओलीले स्थानीय तहको बजेट कटौती नगर्न प्रधानमन्त्री पुष्पकमल दाहालसँग आग्रह गरेका छन् । बिहीबार प्रधानमन्त्री प्रचण्डलाई भेट्न सिंहदरबार पुगेका अध्यक्ष ओलीले स्थानीय तहमा बजेट कटौती गर्दा विकास आयोजना प्रभावित हुने भन्दै गत वर्षको भन्दा कम बजेट नदिन आग्रह गरेका छन् ।   

सिंहदरबारको भेटमा दुवै नेताबीच आगामी आर्थिक वर्षको बजेटबारे केहीबेर छलफल भएको प्रधानमन्त्रीको निजी सचिवालयले जानकारी दिएको छ । बजेटलाई जनमुखी र कार्यान्वयनमा जाने गरी बनाउनुपर्ने ओलीको सुझाव थियो । अहिलेको अर्थतन्त्रलाई माथि उठाउनका लागि आवश्यक कार्य योजना ल्याउनुपर्ने भन्दै ओलीले बजेटलाई सकारात्मक बनाउन एमालेको पूर्ण सहयोग रहने बताएका थिए । 

सरकारले स्थानीय तहमा जाने वित्तीय समानीकरण अनुदान ५० प्रतिशतले कटौती गरेपछि भेटका क्रममा ओलीले सरकारले स्थानीय तहको बजेट कटौती गरेकाेमा प्रधानमन्त्रीको ध्यानाकर्षण गराएका थिए । यस्तै संवैधानिक परिषदको बैठक र प्रधानन्यायाधीश नियुक्तिका विषयमा पनि दुई नेताबीच छलफल भएको थियो । एमालेले सहमति नजनाउँदा सर्वोच्च अदालतको प्रधानन्यायाधीश नियुक्तिका लागि नाम सिफारिस हुन सकेको छैन । 

एमालेबाट निर्वाचित जनप्रतिनिधिले ओली समक्ष स्थानीय तहको बजेट कटौती हुँदा विकास निर्माणका काम प्रभावित भएको भन्दै गुनासो गरेपछि ओली यस विषयमा प्रधानमन्त्रीसँग छलफल गर्न सिंहदरबार पुगेका हुन् । उनीहरूबीच आगामी वैशाख २४ गते बोलाइएको संसद अधिवेशन र समसामयिक राजनीति लगायतका विषयमा कुराकानी भएको ओलीका स्वकीय सचिव राजेश बज्राचार्यले जानकारी दिएका छन् । 

 भेटमा ओलीले नक्कली भुटानी शरणार्थी प्रकरणमा एमालेका सचिव टोपबहादुर रायमाझीका विषयमा पनि प्रधानमन्त्री प्रचण्डसँग छलफल गरेका थिए । भेटमा ओलीले रायमाझी बाटोमा हिँड्दाहिँड्दै समाउनुपर्ने खालको व्यक्ति नभएको र षड्यन्त्रपूर्वक पक्राउ गर्ने कोशिस भएको बताएका थिए ।