कारागारमा रेशम चौधरीसँग विप्लवको राजनीतिक भेट

२१ वेशाख, काठमाडौं । नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ले राजद्रो र कर्तव्य ज्यान मुद्दामा सजाय भुक्तान गरिरहेका नागरिक उन्मुक्ति पार्टीका नेता रेशम चौधरी कारागारमै पुगेर भेट गरेका छन् ।

२०७२ साउन ७ मा कैलालीको टिकापुरमा भएको आगजनी र हत्या काण्डमा उनी ६ वर्षदेखि डिल्लीबजार जेलमा छन् । जेलमै रहेका बेला उनकै पहलमा गठित नाउपाले स्थानीय र संघ÷प्रदेश चुनावमा उल्लेख सफलता पाएको छ । 

विप्लवले जेलमा पुगेर देशको विद्यमान समसामयिक राजनीतिक परिस्थितिबारे छलफल गरेका छन् । भेटका क्रममा नाउपाका संरक्षक समेत रहेका चौधरीले आफूमाथि राज्यबाट अन्याय भएको र राजनीतिक अधिकारको संघर्षमा सत्तामा पुगेका दलहरुले प्रतिशोधको व्यवहार गरेको भन्दै गुनासाे सुनाएका थिए ।

उनले सत्तामा रहेका राजनीतिक पार्टीहरुको गलत प्रवृत्ति र जनविरोधी नीतिका कारण देश चौतर्फी संकटमा पर्दै गएको बताएको छलफलमा सहभागी नेकपाका एक नेताले बताए । चौधरीले अहिले जनताले वर्तमान राजनीतिमा विकल्प खोजिरहेको र त्यसमा नेकपाले पहल गरेको देख्दा खुशी लागेको बताएका थिए । 

छलफलमा महासचिव विप्लवले चौधरीमाथिको राज्यको रवैया गैरन्यायिक भएको , नेपाल कम्युनिस्ट पार्टीले उनको रिहाईका लागि पहल गर्ने आश्वसन दिएका थिए । भेटमा नेकपा र नाउपाबीच मिल्ने विषयमा साझा कार्यक्रम बनाएर अगाडि बढ्नेबारे पनि छलफल भएको थियो । 

नेकपा निर्वाचन आयोगमा दर्ता नगरी राजनीतिक गतिविधि गर्दै आइरहेको छ । सोही कारण उनको गतिविधिलाई लिएर तत्कालीन केपी ओली नेतृत्वको सरकारले २०७६ चैत २८ गतेदेखि २०७८ फागुन २१ गतेसम्म प्रतिबन्ध लगाएको थियो । सो क्रममा राज्यबाट एक सुरक्षाकर्मीसहित २ र नेकपाका १३ जनाले ज्यान गुमाएका थिए ।