मन्त्री शर्माको प्रश्न : ‘विज्ञापनमा महिला नै छनोट हुनुपर्ने किन ?’

२१ वैशाख, काठमाडौं । सञ्चार तथा सूचना प्रविधिमन्त्री रेखा शर्माले महिलालाई विज्ञापनको साधन बनाइनु गलत भएको धारणा राखेकी छन् । बिहीबार ललितपुरमा आयोजित विज्ञापनमा लैङ्गिक उत्तरदायित्व विषयक छलफल कार्यक्रममा बोल्दै मन्त्री शर्माले यस्तो बताएकी हुन् ।

उनले कुनैपनि वस्तुको विज्ञापन गर्दा महिला नै छान्नुको कारण आफूले नबुझेको भन्दै प्रश्न समेत गरेकी छन् ।  ‘महिलालाई विज्ञापनको साधन बनाउनु हुँदैन। कुनैपनि कुराको विज्ञापन गर्दा महिला नै छनोट हुनुपर्ने किन ?’ उनले प्रश्न गरिन् । सुन्दरताकै कारण महिला छानिने कुरामा आफूलाई विश्वास नरहेको उनको भनाइ थियो । 

उनले कुनैपनि कुराको विज्ञापन गर्दा महिला नै छनोट हुनुपर्ने अवस्था आउन नदिने बताउँदै महिलाले विज्ञापनको साधन बन्ने सोचबाट बाहिर निस्कनुपर्ने बताइन् । सुन्दरता हरेक वस्तुमा हुने बताउँदै सुन्दरता पुरुष र महिला दवै हुने र यसमा महिलालाई नै विज्ञापनमा छनौट गर्नु समाजको चेतना प्रकट भएको बताइन् । 

उनले विज्ञापनको कन्टेनमा लैङ्गिक संवेदनशीलता हुनुपर्ने र कतैपनि घोचपेच गरिएको हुन नहुने बताइन् ।