गण्डकीका मुख्यमन्त्री पाण्डेले पाए विश्वासको मत

२१ वैशाख, पोखरा । गण्डकी प्रदेशका मुख्यमन्त्री सुरेन्द्रराज पाण्डेले विश्वासको मत पाएका छन् । बिहीबार प्रदेशसभाको बैठकमा उनले पेस गरेको विश्वासको मत सम्बन्धी प्रस्ताव बहुमतले पारित भएको हो ।

प्रदेशसभामा सो प्रस्ताव सभामुख कृष्णप्रसाद धितालबाट निर्णयार्थ प्रस्तुत हुँदा प्रस्तावको पक्षमा ३५ र विपक्षमा २२ मत परेको थियो । बैठकमा ५९ सांसद उपस्थित थिए । मतदानका क्रममा दुई जना भने तटस्थ रहेका थिए ।

मुख्यमन्त्री पाण्डे वैशाख १४ गते नियुक्त भएका थिए । मुख्यमन्त्री नियुक्त भएको ३० दिनभित्र प्रदेशसभाबाट विश्वासको मत लिनुपर्ने संवैधानिक प्रावधान अनुसार बिहीबार मुख्यमन्त्री पाण्डेले विश्वासको मत लिएका हुन् । नेपाली कांग्रेसबाट उनी माओवादी केन्द्र, एकीकृत समाजवादीको समर्थनमा मुख्यमन्त्री बनेका हुन् ।

विश्वसको मत पाएपछि पाण्डेले मन्त्रिपरिषदलाई पूर्णता दिने काममा लाग्ने बताए । स्वतन्त्र सांसद राजीव गुरुङले पनि मन्त्रालय मागेका छन् ।