हिमपातले आधार शिविरमै रोकिए सगरमाथा आरोही

२१ वैशाख, सोलुखुम्बु । निरन्तर हिमपातका कारण हिमाल आरोहण प्रभावित भएको छ । हिमाल आरोहणको सिजन सुरु भए पनि बेमौसममा हिमपात हुँदा आरोहण हुन नसकेको हो । ७० वर्षको इतिहासमा सबैभन्दा बढी आरोहीले सगरमाथा आरोहणको अनुमति लिए पनि मौसम प्रतिकूल हुँदा आरोहीहरु आधार शिविरमै रोकिएका छन् ।

सगरमाथा आरोहणका लागि ४३ आरोही समूहका ४ सय ६६ जनाले अनुमति लिएका छन् । अहिले विभिन्न हिमाल आरोहरणका लागि गएका १३ सय स्वदेशी तथा विदेशी आधार शिविरमा रहेको सगरमाथा प्रदूषण नियन्त्रण समितिले जनाएको छ ।

आधार शिविरमा यतिका आरोहीको ओइरो लागेको यो पहिलो पटक हो । ‘आधार शिविरमा अहिले १३ सयभन्दा बढी पर्यटक छन्, हिमपात धेरै छ, आरोहीहरु हिमाल चढ्न सक्ने अवस्था छैन,’ एसपीसीसीका अध्यक्ष लामाकाजी शेर्पाले भने । विगत ५ दिनदेखि खुम्बु क्षेत्रमा बाक्लो हिमपात भइरहेको छ ।  

अहिले आरोहीहरु पहिलो आधार शिविर र दोस्रो आधार शिविरबाट आधार शिविरमा ओहोरदोहोर गर्ने काम गरिरहेका छन् । शेर्पाहरुले आरोहणका लागि सामान ओसार्ने कामलाई भने निरन्तरता दिएका छन । केही आरोही अनुकूल मौसमको पर्खाइमा नाम्चे झर्न थालेका छन् ।