मछिन्द्र क्लब लिगको पाँचौ स्थानमा उक्लियो

२१ वैशाख, काठमाडौं । शहीद स्मारक ए डिभिजन लिगको साविक विजेता मछिन्द्र क्लब अंक तालिकाको पाँचौ स्थानमा उक्लिएको छ । आज भएको खेलमा संकटा एफसीलाई ३–१ गोल अन्तरले हराउँदै मछिन्द्र २१ अंक जोड्दै उक्लिएको हो । 

दशरथ रंगशालामा भएको खेलमा मछिन्द्रमा लागि देवेन्द्र तामाङ, विमल घर्ती मगर र ओलावाले आफिजले गोल गरे । खेलको चौथो मिनेटमै मछिन्द्रलाई देवेन्द्र तामाङले गोल गर्दै अग्रता दिलाएका थिए । पुजन उपरकोटीको प्रहार गोलरक्षक टिकेन्द्र थापाले समाउन नसक्दा फर्किएको बललाई देवेन्द्रले पोष्टको दिशा दिएका हुन् ।

खेलको १९ औं मिनेटमा निशेन सुब्बाको क्रसमा विमल घर्ती मगरले हेडर गोल गर्दै अग्रता दोब्बर पारे । ६९ औं मिनेटमा सौरभ लिम्बुको पासमा ओलावाले आफिजले संकटाका गोलरक्षक टिकेन्द्रलाई वान भर्सेस वानमा बिट गर्दै गोल गरे ।

खेलको ७८ औं मिनेटमा संकटाका लागि जुनियर एन्कंगेले निशान खड्काको क्रशमा सान्त्वना गोल फर्काए । संकटा भने छैटौं हारसँगै ११ औं स्थानमा छ । 

उता, एन्फा कम्प्लेक्स सातदोबाटोमा भएको खेलमा भने एपीएफ र एनआरटीले अंक बाँडेका छन् ।