ब्राउन सुगरसहित दिदीबहिनी पक्राउ

२२ वैशाख, काठमाडौं । प्रहरीले झापामा ब्राउन सुगर ओसारपसारको आरोपमा सहित युवतीलाई पक्राउ गरेको छ । पक्राउ पर्नेमा हेटौंडा घर भई मेसीनगरमा बस्दै आएकै २३ वर्षीया सन्ध्या श्रेष्ठ र २१ वर्षीया सोनी श्रेष्ठ रहेकी छन् । अभियुक्त उनीहरु दिदीबहिनी रहेको बुझिएको छ । 

उनीहरुलाई बिहीबार साँझ भद्रपुरस्थित विमानस्थलबाट पक्राउ गरिएको हो । बुद्ध एरको उडानबाट काठमाडौं जान लागेकी सोनीलाई चेकजाँचका क्रममा ७६ ग्राम ब्राउन सुगर फेला परेपछि नियन्त्रणमा लिइएको र उनकै भनाइका आधारमा उनका दिदी सन्ध्यालाई पनि नियन्त्रणमा लिएर अनुसन्धान गरिरहेको प्रहरीले जनाएको छ । 

सोनीले उक्त परिमाणको ब्र्राउन सुगर गुप्तांगमा प्याडमा राखेर काठमाडौं लैजान लागिएको अवस्थामा फेला परेको प्रहरीको दाबी छ । अभियुक्तहरुलाई शुक्रबार सार्वजनिक गर्ने तयारी भइरहेको जनाइएको छ ।