काठमाडौंका उभौली रमझममा कोशी नामाकरणको विरोध [फाेटाेफिचर]

२२ वैशाख, काठमाडौं । शुक्रबार देशभर किरात समुदायले उभौली पर्व मनाइरहेका छन् । काठमाडौंको नयाँ बानेश्वरमा भेला भएकाहरुले ‘कोशी’ प्रदेश नामाकरणको विरोध गर्दै किराँत समुदायले उभौली पर्व मनाएका छन् । उनीहरुले साँस्कृति पहिचान झल्कने बाजागाजा र नाचगानसहित उभौली पर्व मनाए ।

जातीय पहिरनमा सजिएका महिला र पुरुषले पर्वको रौकनबीचमै  ‘कोशी मुर्दावाद’ लेखिएको प्लेकार्ड प्रदर्शन गरे । सयौं संख्यामा भेला भएका उनीहरुले सडकमै साकेला नाचेर कोशी नामकरणको विरोध गरेका छन् । 

आफूहरुको चाड र सांस्कृतिक पहिचानलाई मुख्य राजनीतिक दलहरुले नै बहिष्करणमा पारेकाले उभौलीलाई खबरदारीको रुपमा मनाइएको किरात राई याक्खाका अध्यक्ष जीवन राईले बताए । 

किरात समुदायले कोशी प्रदेशको नाम परिवर्तन गरी प्राचीन सभ्यता, ऐतिहासिक पृष्ठभूमि, भूगोल र सांस्कृतिक पहिचानको आधारमा पुनः नामकरण गर्नुपर्ने माग काठमाडौंमा पनि दोहोर्याए ।

प्रदेशको नाम कोशीलाई परिवर्तन गर्नुपर्ने माग राख्दै किरात, राई, लिम्बू लगायत पहिचान पक्षधरहरुले आन्दोलन जारी राखेका छन् । आन्दोलनका क्रममा पदम लिम्बूको ज्यान समेत गएको छ । उनलाई सरकारले शहीद घोषणा गरिसकेको छ । पुनः नामाकरण नभएसम्म आन्दोलन नरोकिने उनीहरुको अडान छ ।