मुलुकमा सुशासन कायम गरी आर्थिक स्थायित्व कामय गराउन प्रतिबद्ध छुः प्रधानमन्त्री प्रचण्ड

२२ वैशाख, काठमाडौं । प्रधानमन्त्री पुष्पकमल दाहाल प्रचण्डले मुलुकमा सुशासन कायम गरी आर्थिक विकासका काम अगाडि बढाउन आफू प्रतिबद्ध रहेको बताएका छन् । उनले आर्थिक कठिनाइलाई समाधान गर्दै सुशासन कायम गर्न सरकार लागि परेको बताएका छन् ।

पश्चिम नवलपरासीको रामग्राम नगरपालिकाले बुद्ध जयन्तीको अवसरमा शुक्रबार आयोजना गरेको समारोहमा प्रचण्डले देशमा देखापरेको आर्थिक कठिनाईलाई चिर्दै जनताको मनोभावनाअनुसार काम गर्नु नै आफ्नो मुख्य उद्देश्य भएको बताए । बृहत्तर लुम्बिनीको विकासका लागि रामग्राम स्तूपको विशेष महत्व रहेको भन्दै उनले रामग्राम विकास गुरुयोजना कार्यान्वयनमा ल्याउने प्रतिबद्धता व्यक्त गरे ।

बुद्ध सर्किटमा पर्ने बुद्धसँग सम्बन्धित ऐतिहासिक स्थलको संरक्षण र प्रचारप्रसार गरेर धार्मिक पर्यटकलाई नेपाल भित्र्याउनुपर्ने प्रचण्डले बताए । लुम्बिनी विकास कोषले रामग्राम स्तूपको विकासमा प्रभावकारी पहल नगरेको भन्दै छुट्टै रामग्राम विकास कोष स्थापना गरीने रामग्राम नगरपालिकाका प्रमुख धनपत यादवले बताए ।

बुद्ध जयन्तीको अवसरमा रामग्राम नगरपालिकाले पण्डितपुर र रामग्राम स्तूपमा आज अस्तुपूजासहित कार्यक्रम आयोजना गरेको थियो ।