बेलायती राजा चार्ल्सको राज्याभिषेक आज, विश्वभरीका विशिष्ट पाहुना बेलायतमा

२३ वैशाख, लन्डन। बेलायतका राजा चार्ल्स तृतीयको आज राज्याभिषेक हुँदैछ  । लन्डनको वेस्टमिन्स्टर एबीमा एक विशेष समारोहका बीचमा आयोजना हुने राज्याभिषेक समारोहमा राजा चार्ल्सलाई राज मुकुट पहिराइने छ ।
 
सो विशेष समारोहमा सहभागिताका लागि विश्वभरीबाट दुई हजार भन्दा बढी अति विशिष्ट पाहुनाहरू बेलायत आई पुगेका छन् । यसरी आउने पाहुनाहरूमा विभिन्न देशका राजा तथा राजपरिवारका सदस्यहरू, विश्वभरीका विभिन्न मुलुकका राजनेताहरू, राष्ट्रपति, प्रधानमन्त्रीसहित सरकारका प्रतिनिधिहरु सो समारोहमा सहभागी हुदैँछन् ।

आज हुने विशेष समारोहमा राजा चार्ल्स तथा रानी क्वीन कन्सोर्ट क्यामिलालाई राज मुकुट पहिर्‍याउने कार्यक्रम रहेको बीबीसीले जनाएको छ । बीबीसीका अनुसार २।२३ किलो ग्राम तौल भएको सुन र हीरा जवाहरातजडित राज मुकुटले राजा चार्ल्सको शिरमा सुशोभित गरिनेछ । 

सो राज मुकुट यस अघि सन् १९५३ मा महारानी एलिजाबेथको शिरमा सजाइएको थियो । बेलायतको इतिहासमै सबैभन्दा बढी शासन गरेकी महारानी एलिजाबेथ द्वितीयाको ९६ वर्षको उमेरमा गत सेप्टेम्बरमा निधन भएको थियो । 

महारानी एलिजाबेथको निधन भए पछि उनका ७३ बर्षीया छोरा चार्ल्स बेलायतको राजा बनेका हुन । उनको आज हुन गइरहेको राज्याभिषेक समारोह भने झन्डै तीन घन्टा चल्ने जनाइएको छ ।