एमालेले केन्द्रीय कमिटी बैठक काठमाडौंमै गर्ने

२४ वैशाख, काठमाडौं । प्रमुख प्रतिपक्षी नेकपा (एमाले)ले केन्द्रीय कमिटीको बैठक काठमाडौंमै गर्ने भएको छ । यसअघि यही वैशाख २८ देखि ३० गतेका लागि अध्यक्ष केपी ओलीको गृह जिल्ला झापामा बोलाएको केन्द्रीय कमिटी (सीसी) बैठक काठमाडौंमा बस्ने भएको हो । 

संसदको बजेट अधिवेशन सुरु भएकाले पार्टीका सांसदहरु बैठकमा व्यस्त हुनुपर्ने भएपछि केन्द्रीय कमिटी बैठक काठमाडौंमै सारिएको केन्द्रीय कार्यालयका सचिव भीष्म अधिकारीले जानकारी दिए ।

बैठकमा चुनावको समीक्षा र चुनावपछि संगठन सुदृढिकरणका लागि सञ्चालित ‘मिसन ग्रास रुट’ अभियानबारे छलफल हुने जनाएका छन् । ४ मंसिरको आम चुनावपछि बस्न लागेको एमालेको यो पहिलो केन्द्रीय कमिटी बैठक हो । सीसी बस्नुअघि २६ गते सचिवालयको बैठक बस्ने अधिकारीले बताए ।